بھارتی سپر اسٹار اورسیاستدان تھلاپتی وجے کی انتخابی ریلی میں بھگدڑ مچنے سے بچوں سمیت 31 افراد ہلاک اور 50 زخمی ہوگئے۔
بھارتی میڈیا رپورٹ کے مطابق افسوسناک واقعہ تمل ناڈو کے ضلع کروُر میں پیش آیا جہاں تھلاپتی وجے اپنے سیاسی جماعت ٹی وی کے کی انتخابی مہم کے سلسلے میں ریلی سے خطاب کر رہے تھے۔
رپورٹ کے مطابق ریلی میں بھگدڑ اس وقت مچی جب ہجوم میں موجود متعدد افراد بے ہوش ہو کر گرنے لگے۔
عینی شاہدین کے مطابق کارکنوں نے فوراً شور مچایا اور وجے نے اپنا خطاب روک کر پانی کی بوتلیں پھینک کر لوگوں کو ہوش میں لانے کی کوشش کی، تاہم ریسکیو ٹیموں کو بھیڑ میں پہنچنے میں شدید مشکلات کا سامنا کرنا پڑا۔
زخمیوں کو قریبی اسپتالوں میں منتقل کیا گیا، جہاں کئی کی حالت تشویشناک بتائی جا رہی ہے۔
تامل ناڈو کے وزیراعلیٰ ایم کے اسٹالن نے سانحے پر گہری تشویش کا اظہار کیا اور حکام کو ہدایت کی کہ وہ زخمیوں کو فوری طبی امداد فراہم کریں۔
انہوں نے سوشل میڈیا پلیٹ فارم ایکس (سابقہ ٹوئٹر) پر لکھا ”کروُر سے آنے والی خبریں انتہائی افسوسناک ہیں، میں نے وزراء اور ضلعی انتظامیہ کو فوری ایکشن کی ہدایت دے دی ہے تاکہ تمام زخمیوں کو فوری طبی سہولیات فراہم کی جائیں۔“
انہوں نے مزید کہا کہ وزیر تعلیم انبل مہیش کو بھی ہدایت دی گئی ہے کہ وہ جنگی بنیادوں پر امدادی کارروائیوں کی نگرانی کریں، جبکہ (ایڈیشنل ڈائریکٹر جنرل پولیس) سے سیکیورٹی صورتِ حال کو کنٹرول میں رکھنے کی اپیل کی گئی ہے۔
وزیراعلیٰ اسٹالن کل کروُر کا دورہ کریں گے تاکہ صورتِ حال کا خود جائزہ لے سکیں۔
یاد رہے کہ تھلاپتی وجے جنوبی بھارت کے صفِ اول کے اداکار ہیں جنہوں نے حال ہی میں سیاسی میدان میں قدم رکھا ہے اور ان کی پارٹی تاملگا ویٹری کزگم (TVK) تمل ناڈو میں بھرپور عوامی مقبولیت حاصل کر رہی ہے۔