فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی تاریخ میں توسیع سے انکار کردیا ہے۔
ایف بی آر کی ویب سائٹ کے مطابق ایف بی آر نے مختلف میڈیا پلیٹ فارمز پر گردش کرنے والی ان غیر مصدقہ خبروں کا نوٹس لیا ہے، جن میں یہ دعویٰ کیا جا رہا ہے کہ ٹیکس سال 2025 کے انکم ٹیکس ریٹرن جمع کرانے کی آخری تاریخ میں توسیع کی جائے گی۔ بعض عناصر نے توسیع کی افواہ کو حالیہ سیلاب سے بھی جوڑنے کی کوشش کی ہے۔
ایف بی آر کی جانب سے جاری وضاحت میں کہا گیا ہے کہ سال 2025 کے لیے انکم ٹیکس ریٹرن جمع کروانے کی آخری تاریخ میں توسیع کی خبریں غلط، بے بنیاد اور گمراہ کن ہیں، انکم ٹیکس ریٹرن جمع کروانے کی آخری تاریخ میں کسی قسم کی توسیع نہیں کی جائے گی اور مقررہ تاریخ تک ریٹرن فائل نہ کرنے پر قانون کے تحت جرمانے کیے جائیں گے۔
ترجمان ایف بی آر نے کہا کہ ایمانداری کے ساتھ اپنے انکم ٹیکس ریٹرن 30 ستمبر کی آخری تاریخ سے پہلے جمع کروائیں، ٹیکس دہندگان کی اکثریت ان علاقوں میں رہائش پذیر ہے جو سیلاب سے متاثر نہیں ہوئے اور سیلاب سے متاثر نہ ہونے والوں کو قومی فریضے کی ادائیگی کے لیے کافی وقت دیا جا چکا ہے۔
ترجمان نے مزید کہا کہ ایف بی آر کے آئی آر آئی ایس سسٹم کی سست روی کا دعویٰ بھی بے بنیاد ہے بلکہ آئی آر آئی ایس پلیٹ فارم مکمل طور پر فعال ہے اور بخوبی کام کر رہا ہے، ٹیکس دہند گان نئے سادے انکم ٹیکس ریٹرن فارم کے ذریعے ریٹرن جمع کروا سکتے ہیں۔
انہوں نے کہا کہ اگر ٹیکس دہندگان کسی مشکل میں ہوں تو متعلقہ کمیٹی کی منظوری سے 15 دن کی توسیع حاصل کر سکتے ہیں۔ بشرطیکہ واجب الادا ٹیکس 30 ستمبر تک ادا کر دیا جائے۔