کراچی میں دو الگ الگ پولیس مقابلے، 3 زخمیوں سمیت 4 ملزمان گرفتار

0 minutes, 0 seconds Read
شہر قائد میں پولیس اور جرائم پیشہ عناصر کے درمیان دو مختلف مقامات پر مبینہ پولیس مقابلے ہوئے جن کے دوران فائرنگ کے تبادلے میں تین زخمی ملزمان سمیت چار ملزمان کو گرفتار کر لیا گیا۔

پولیس نے دونوں واقعات میں اسلحہ اور موٹر سائیکل برآمد کرنے کا دعویٰ بھی کیا ہے۔

پہلا مقابلہ پاک کالونی تھانے کی حدود میں میوہ شاہ کے ایم سی کٹ کے قریب پیش آیا، جہاں پولیس نے گشت کے دوران مشکوک موٹر سائیکل سواروں کو رکنے کا اشارہ کیا۔

پولیس کے مطابق ملزمان نے رکنے کے بجائے فائرنگ شروع کر دی، جس کے جواب میں پولیس نے بھی جوابی فائرنگ کی۔

فائرنگ کے تبادلے کے بعد دو ملزمان ریحان عرف گنجا اور ریاض عرف چاچو زخمی حالت میں گرفتار کر لیے گئے۔

پولیس نے دعویٰ کیا ہے کہ ان کے قبضے سے دو پستول اور ایک موٹر سائیکل برآمد ہوئی ہے۔

زخمی ملزمان کو فوری طبی امداد کے لیے اسپتال منتقل کر دیا گیا۔

دوسرا مبینہ پولیس مقابلہ کورنگی بھٹائی چوکی کے قریب پیش آیا، جہاں بھی مشتبہ افراد کی جانب سے پولیس پر فائرنگ کی گئی۔

جوابی کارروائی میں ایک ملزم زخمی ہوا جبکہ دوسرے کو حراست میں لے لیا گیا۔

پولیس کا کہنا ہے کہ گرفتار ملزمان کے قبضے سے ایک موٹر سائیکل اور اسلحہ برآمد ہوا ہے، جبکہ زخمی ملزم کو طبی امداد کے لیے اسپتال منتقل کر دیا گیا ہے اور دوسرے ملزم سے تفتیش جاری ہے۔

Similar Posts