ایکسپریس نیوز کے مطابق افغانستان کی جانب سے حالیہ جارحیت کے خلاف انجمنِ تاجران کے صدر شاہد خان اور مسلم لیگ (ن) کے سابق امیدوار میاں سعید بادشاہ کی قیادت میں اتوار کے روزپشاورمیں احتجاجی مظاہرہ کیا گیا۔
یہ مظاہرہ شہر کے مرکزی بازار میں ہوا، جس میں تاجروں، شہریوں اور مختلف سماجی تنظیموں کے نمائندوں نے بڑی تعداد میں شرکت کی۔
شرکاء نے ہاتھوں میں بینرز اور پلے کارڈز اُٹھا رکھے تھے جن پر ’’پاکستان زندہ باد‘‘، ’’افغان مداخلت نامنظور‘‘ اور ’’قوم اپنی خودمختاری پر سمجھوتہ نہیں کرے گی‘‘ جیسے نعرے درج تھے۔
مظاہرین نے حکومتِ پاکستان سے مطالبہ کیا کہ افغان سرحدی خلاف ورزیوں اور پاکستان دشمن سرگرمیوں کے خلاف سخت سفارتی مؤقف اپنایا جائے۔
صدر انجمن تاجران شاہد خان نے اپنے خطاب میں کہا کہ ’’تاجروں اور عوام کو عدمِ تحفظ کا احساس ہے، حکومت کو چاہئے کہ عوامی اعتماد بحال کرنے کے لیے عملی اقدامات کرے۔‘‘
شرکا سے خطاب کرتے ہوئے مسلم لیگ (ن) کے سابق امیدوار میاں سعید بادشاہ نے کہا کہ ’’پاکستان ایک خودمختار ریاست ہے، کسی کو بھی ہماری سلامتی سے کھیلنے کی اجازت نہیں دی جا سکتی۔‘‘
مظاہرے کے اختتام پر شرکاء نے قومی اتحاد اور یکجہتی پر زور دیتے ہوئے وطنِ عزیز کی سلامتی کے لیے دعا بھی کی۔