ایکسپریس نیوز کے مطابق کوہاٹ ٹول پلازہ کے نزدیک قائم چیک پوسٹ پر ڈیوٹی دینے والے ایف بی آر کے دو افسران کو نامعلوم افراد نے فائرنگ کر کے شہید کیا۔
فیڈرل بورڈ آف ریونیو نے ریجنل ٹیکس آفس ہزار(آر ٹی او پشاور) کے دو اہلکاروں کی نامعلوم افراد کے بزدلانہ حملہ میں شہادت کے المناک واقعے کی شدید مذمت کی ہے۔
ایف بی آر ہیڈ کوارٹر کی جانب سے جاری کردہ تفصیلات کے مطابق فیڈرل بورڈ آف ریونیو نے اس بزدلانہ حملے کی شدید مذمت کی ہے جس کے نتیجے میں ریجنل ٹیکس آفس پشاور کے دو اہلکار سپاہی مقدر علی اور سپاہی نذر محمد نے جام شہادت نوش کیا۔
اعلامیے میں کہا گیا ہے کہ افسوس ناک واقعہ اس وقت پیش آیا جب یہ دونوں اہلکار سیلز ٹیکس ایکٹ 1990 کی دفعہ 40ڈی کے تحت کوہاٹ ٹول پلازہ کے نزدیک قائم چیک پوسٹ پر اپنے فرائض سرانجام دے رہے تھے۔
پشاور میں ایف بی آر کی سینئر قیادت چیف کمشنر پشاور اور کمشنروں نے شہدا کی نماز جنازہ میں شرکت کی۔
اعلامیے میں کہا گیا ہے کہ ایف بی آر ان شہدا کی قربانی پر گہرے رنج و غم کا اظہار کرتا ہے اور ان اہلکاروں کو خراجِ عقیدت پیش کرتا ہے جنہوں نے اپنے فرائض کی انجام دہی کے دوران اپنی جانوں کا نذرانہ پیش کیا۔
اس طرح کے بزدلانہ اور مذموم حملے ایف بی آرکے قومی محصولات کے تحفظ اور ٹیکس قوانین کی انفورسمنٹ کے لئے اپنی ذمہ داریاں تندہی سے پوری کرنے کے عزم کو مزید تقویت دیں گے۔
ایف بی آر کی قیادت نے شہدا کے اہل خانہ کو حکومت کی پالیسی کے مطابق ہر ممکن تعاون کی یقین دہانی کرائی ہے، بورڈ اس بات کو یقینی بنائے گا کہ تمام مالی اور دیگر سہولیات بغیر کسی تاخیر کے ان خاندانوں تک پہنچائی جائیں سپاہی مقدر علی اور سپاہی نذر محمد کی قربانی کو ہمیشہ یاد رکھا جائے گا۔