لاہور میں ریسکیو 1122 اور مقامی افراد کی مشترکہ کارروائی سے بڑا سانحہ ٹل گیا، قاسم والا جنگل میں لگی آگ پر بروقت قابو پا لیا گیا، جس کے بعد واقعے کا مقدمہ درج کرلیا گیا جبکہ سینٸر صوباٸی وزیر مریم اورنگزیب نے واقعے کا نوٹس لیتے ہوئے 24 گھنٹے میں رپورٹ طلب کر لی اور اعلیٰ افسران پر مشتمل تحقیقاتی کمیٹی تشکیل دے دی ۔
ترجمان محکمہ جنگلات کے مطابق قاسم والا جنگل میں عباسیہ کینال کے قریب بنجر علاقے میں آگ لگ گئی، فوری اطلاع پر محکمہ جنگلات نے بھرپور ایکشن لیا، پھکووال بلاک نمبر ایک میں لگی آگ پر رات 10 بجے مکمل قابو پایا گیا، بلاک نمبر 2 کی آگ رات بھر کی کوششوں کے بعد صبح 9 بجے بجھا دی گئی۔
بروقت کارروائی سے صرف چند ایکڑ جھاڑیاں اور 45 چھوٹے درخت متاثر ہوئے، 100 سے زائد اہلکاروں اور افسران نے ریسکیو مشن میں حصہ لیا۔
دوسری جانب سینئر وزیر پنجاب مریم اورنگزیب نے قاسم والا جنگل میں آتشزدگی کے واقعے کی مکمل تحقیقات کے لیے اعلیٰ افسران پر مشتمل تحقیقاتی کمیٹی تشکیل دے دی ہے۔
مریم اورنگزیب نے کہا کہ واقعے کی تفصیلی رپورٹ 24 گھنٹوں میں طلب کر لی گئی ہے تاکہ اس واقعے کے محرکات اور ذمہ داران کا تعین کیا جا سکے۔
ان کا کہنا تھا کہ جنگل میں آگ لگانے والے نا معلوم افراد کے خلاف ایف آئی آر درج کر لی گئی ہے، وزیر اعلیٰ پنجاب مریم نواز کے ویژن کے مطابق جنگلات کی حفاظت ہماری اولین ترجیح ہے اور اس حوالے سے کوئی غفلت برداشت نہیں کی جائے گی۔
مریم اورنگزیب نے قاسم والا جنگل میں لگی آگ پر بروقت قابو پانے پر محکمہ جنگلات کی کارکردگی کو سراہتے ہوئے کہا کہ یہ ان کی انتھک محنت کا نتیجہ ہے کہ بڑے پیمانے پر نقصان ہونے سے بچا لیا گیا۔
سینئر وزیر نے آگ بجھانے میں حصہ لینے والے تمام فیلڈ اسٹاف کی حوصلہ افزائی کا اعلان بھی کیا اور کہا کہ ایسے بہادر اہلکاروں کی خدمات کو تسلیم کیا جائے گا جنہوں نے اپنی جان کی پرواہ کیے بغیر آگ پر قابو پایا۔
انہوں نے مزید کہا کہ حکومت ایسے واقعات کی روک تھام کے لیے مزید سخت اقدامات کرے گی تاکہ قدرتی وسائل کو ہر ممکن تحفظ فراہم کیا جا سکے۔
ٹھل میں آتشزدگی سے باگڑی برادری کی 5 جھگیاں جل کر خاستر
ادھر ٹھل میں آتشزدگی سے باگڑی برادری کی 5 جھگیاں جل کر خاستر ہوگئیں جبکہ جھگیوں میں موجودلاکھوں روپے کا قیمیتی سامان بھی جل گیا۔
متاثرہ افراد روی باگڑی ،ہری باگڑی اور نریش باگڑی کا کہنا تھا کہ بجلی کی تار گرنے کے سبب شارٹ سرکٹ ہوگیا اور آگ لگ گئے اور دیکھتے ہی دیکھتے 5 جھگیوں کو مکمل طورپر لپیٹ میں لے لیا۔
آتشزدگی سے جھگیوں میں موجود لاکھوں روپے کا قیمتی سامان بھی جل کر خاکستر ہوگیا، کھلے آسمان تلے بے یارو مدد گار پڑے ہیں، انتظامیہ مالی مدد کرے۔