پاکستان سعودی عرب کی سیکیورٹی کے تحفظ کے لیے اس کے ساتھ کھڑا ہے: ترجمان دفتر خارجہ

ترجمان دفتر خارجہ سجاد حیدر خان نے سعودی عرب پر حوثیوں کے حملوں کی مذمت کرتے ہوئے کہا ہے کہ پاکستان سعودی عرب کی خودمختاری، علاقائی سالمیت اور سیکیورٹی کے تحفظ کے لیے اس کے ساتھ کھڑا ہے۔

دفتر خارجہ کی ہفتہ وار نیوز بریفنگ کے دوران ترجمان سجاد حیدر خان نے کہا کہ پاکستان سعودی عرب پر ہونے والے حملوں کی مذمت کرتا ہے اور اس مشکل وقت میں سعودی عرب کے ساتھ مکمل یکجہتی کا اظہار کرتا ہے۔

ترجمان دفتر خارجہ کا کہنا تھا کہ شہریوں اور بنیادی ڈھانچے کو نشانہ بنانا ناقابل قبول ہے۔ پاکستان حملوں میں جاں بحق ہونے والے افراد کے اہل خانہ سے تعزیت کرتا ہے اور متاثرہ خاندانوں کے دکھ میں برابر کا شریک ہے۔

سجاد حیدر خان نے کہا کہ پاکستان سعودی عرب کی خودمختاری، علاقائی سالمیت اور سیکیورٹی کے تحفظ کے لیے اس کے ساتھ کھڑا ہے۔

انہوں نے واضح کیا کہ پاکستان مکہ معاہدے کے تحت سعودی عرب کے ساتھ کھڑا ہے اور مشترکہ دفاعی معاہدے کے حوالے سے اپنے عزم پر قائم ہے۔

دوسری جانب ترجمان دفتر خارجہ نے بتایا کہ عمان کے وزیر خارجہ نے پاکستان کا دورہ کیا، جس کے دوران دونوں ممالک کے درمیان مختلف شعبوں میں تعاون بڑھانے پر زور دیا گیا۔

اُدھر بھارت کے وزیر دفاع کے پاکستان مخالف بیان پر ردعمل دیتے ہوئے سجاد حیدر خان نے کہا کہ پاکستان اس بیان کو مسترد کرتا ہے اور بھارت کو گزشتہ سال کے واقعات سے سبق سیکھنا چاہیے۔

بھارتی وزیر دفاع راج ناتھ سنگھ نے پاکستان کو دھمکی دیتے ہوئے کہا تھا کہ آئندہ پاکستان سے ہونے والی کسی بھی دہشت گرد کارروائی کا بھارت پہلے سے زیادہ سخت اور طاقتور جواب دے گا۔

ترجمان دفتر خارجہ نے واضح کیا کہ پاکستان اپنی علاقائی خودمختاری اور سالمیت کے تحفظ کے لیے مکمل طور پر تیار ہے۔ کسی بھی جارحیت کا پوری قوت سے جواب دیا جائے گا اور پاکستان کسی بھی جارح کو منہ توڑ جواب دینے کی صلاحیت رکھتا ہے۔

ترجمان دفتر خارجہ نے یورپ میں غیرقانونی ہجرت کی روک تھام کے حوالے سے بتایا کہ پاکستان نے اس سلسلے میں نمایاں اقدامات کیے ہیں، جن کے نتیجے میں یورپ کی جانب غیرقانونی ہجرت میں 64 فیصد کمی آئی ہے۔