سری لنکا کے خلاف ٹیسٹ اسکواڈ کا اعلان؛ بابر اعظم کپتان، 3 نئے کھلاڑی شامل
پاکستان کرکٹ بورڈ (پی سی بی) نے سری لنکا کے خلاف دو ٹیسٹ میچوں کی سیریز کے لیے 14 رکنی قومی اسکواڈ کا اعلان کر دیا ہے. بابر اعظم کو ٹیسٹ ٹیم کا کپتان برقرار رکھا گیا ہے جب کہ تین نئے کھلاڑیوں کو بھی پہلی مرتبہ ٹیسٹ اسکواڈ میں شامل کرلیا گیا ہے۔
پی سی بی کے اعلان کردہ 14 رکنی ٹیسٹ اسکواڈ میں سلیکشن کمیٹی نے نئے کھلاڑیوں اور ڈومیسٹک کرکٹ میں نمایاں کارکردگی دکھانے والے بیٹرز کو موقع دیتے ہوئے محمد طحٰہ، محمد سلیمان اور سمیر منہاس کو پہلی بار ٹیسٹ ٹیم میں شامل کیا ہے۔
اسکواڈ میں شامل دیگر کھلاڑیوں میں کپتان بابر اعظم، عبداللہ فضل، عرفات منہاس، اذان اویس، محمد عباس، رضااللہ اور سعود شکیل بھی شامل ہیں۔
غازی غوری اور سعد بیگ کو بھی وکٹ کیپرز اسکواڈ کا حصہ بنایا گیا ہے، جبکہ سلمان علی آغا اور لیفٹ آرم اسپنر علی عثمان بھی قومی ٹیم میں جگہ بنانے میں کامیاب رہے ہیں۔
سابق ٹیسٹ کپتان شان مسعود کو رواں سیریز میں ڈراپ کر دیا گیا ہے جب کہ امام الحق، عبداللہ شفیق اور محمد رضوان کو بھی ابتدائی اسکواڈ میں شامل نہیں کیا گیا۔ فاسٹ بولرز عامر جمال، خرم شہزاد اور محمد علی کے علاوہ اسپنر ساجد خان بھی ٹیم کا حصہ نہیں ہیں۔
نئے کھلاڑیوں کی سلیکشن
ہفتے کو اعلان کردہ اسکواڈ میں تین نئے کھلاڑیوں، محمد طحہ، محمد سلیمان اور سمیر منہاس کو پہلی مرتبہ ٹیسٹ ٹیم میں شامل کیا گیا ہے۔
محمد طٰحہ پریذیڈنٹس ٹرافی گریڈ ون ٹورنامنٹ میں سب سے زیادہ رنز بنانے والے بیٹر ہیں۔ انھوں نے ستمبر سے اب تک سات میچوں میں 730 رنز بنائے ہیں، جن میں تین سنچریاں اور 225 رنز کی بہترین انفرادی اننگز شامل ہے۔
محمد سلیمان بھی ٹورنامنٹ میں نمایاں رہے ہیں۔ وہ سات میچوں میں 652 رنز کے ساتھ بیٹنگ فہرست میں پانچویں نمبر پر ہیں۔ ان کے ریکارڈ میں بھی تین سنچریاں شامل ہیں۔
سمیر منہاس اپنا پہلا فرسٹ کلاس سیزن کھیل رہے ہیں۔ انھوں نے پاکستان کی انڈر 19 ٹیم کی جانب سے متاثر کن کارکردگی کے بعد سات میچوں میں 405 رنز بنائے ہیں۔
تینوں کھلاڑیوں کو ڈومیسٹک کرکٹ میں شاندار کارکردگی کی بنیاد پر ہی پہلی مرتبہ ٹیسٹ اسکواڈ میں شامل کیا گیا ہے۔
پیٹرنز الیون کا اعلان
پی سی بی نے سری لنکا کے خلاف ٹیسٹ سیریز سے قبل تین روزہ وارم اپ میچ کے لیے 13 رکنی پیٹرنز الیون اسکواڈ کا بھی اعلان کیا ہے جس کی قیادت وکٹ کیپر بیٹر سعد بیگ کریں گے۔
پیٹرنز الیون کے اسکواڈ میں عبداللہ فضل، علی عثمان، اذان اویس، محمد سلیمان، محمد طحہ اور سمیر منہاس شامل ہیں۔ محمد سلمان، شعیب اختر جونیئر، علی شبیر، ثاقب خان، محمد طیب عارف اور عبید شاہ بھی ٹیم کا حصہ ہیں۔
پیٹرنز الیون اور سری لنکا کے درمیان وارم اپ میچ 4 سے 6 نومبر تک اسلام آباد کلب میں کھیلا جائے گا۔ میچ مکمل ہونے کے بعد پیٹرنز اسکواڈ میں شامل دو فاسٹ بولرز قومی ٹیسٹ ٹیم کا حصہ بن جائیں گے۔
پاکستان اور سری لنکا کے درمیان سیریز کا پہلا ٹیسٹ 9 سے 13 نومبر تک راولپنڈی کرکٹ اسٹیڈیم میں کھیلا جائے گا، جبکہ دوسرا ٹیسٹ 17 سے 21 نومبر تک لاہور کے قذافی اسٹیڈیم میں شیڈول ہے۔