بلوچستان عوامی پارٹی کے مرکزی سیکریٹری اطلاعات کا وزیر ریلوے حنیف عباسی کی میڈیا سے گفتگو پر ردعمل سامنے آگیا۔
ذرائع کے مطابق سینیٹر کہدہ بابر نے سوشل میڈیا پلیٹ فارم ایکس پر پیغام جاری کرتے ہوئے لکھا کہ گوادر ہمارا تھا، ہمارا رہے گا۔
کہدہ بابر بلوچ کا کہنا تھا کہ یہ درست ہے کہ پاکستان نے گوادر کو عمان سے خریدا، لیکن اس کر ہرگز یہ مطلب نہیں کہ گوادر کے عوام کا اپنے وسائل اور زمین پر حق نہیں۔
انہوں نے کہا کہ گوادر محض ایک خریدا گیا علاقہ نہیں، یہاں کے باسیوں کی پہچان، تاریخ نسلوں سے اس زمین سے جڑی ہوئی ہے۔
ریلوے مسافروں کےلیے خوشخبری : کراچی سے پشاور جانے والی خوشحال خان خٹک ایکسپریس کی بحالی کا اعلان
سینیٹر کہدہ بابر بلوچ نے مطالبہ کرتے ہوئے کہا کہ عمان کے ساتھ گوادر کی خریداری کے معاہدے کو منظر عام پر لایا جائے، قوم کو معلوم ہونا چاہیے گوادر کو کن شرائط پر خریدا گیا۔
کہدہ بابر کا کہنا تھا کہ یہ بھی معلوم ہونا چاہیے معاہدے میں مقامی افراد کے حقوق کا کیا ذکر ہے، گوادر کسی ایک فرد کی جاگیر نہیں، اپنے وسائل، ترقی اور فیصلوں میں برابر کی شراکت مقامی افراد کا بنیادی حق ہے۔
حنیف عباسی نے کیا کہا تھا؟
وفاقی وزیرِ ریلوے حنیف عباسی نے اپنے ایک بیان میں کہا تھا کہ گوادر پورٹ پاکستان کا ہے، کسی کے باپ دادا کا نہیں ہے۔
وزیرِ ریلوے حنیف عباسی نے مغل پورہ میں گفتگو کرتے ہوئے کہا تھا کہ ریلوے میں اوور ٹائم کا نظام بحال کر دیا ہے، ہر ماہ کی 5 تاریخ کو مزدوروں کو تنخواہ ادا کر دی جائے گی۔