پاکستان سے غیر قانونی طور پر مقیم افغان باشندوں کا انخلا جاری، آج 3 ہزار سے زائد افراد طورخم کے راستے بے دخل کر دیے گئے۔ رضاکارانہ طور پر آنے والے غیر ملکی خاندانوں کی لنڈی کوتل ٹرانزٹ کیمپ میں قانونی کارروائی ہوئی۔
ایڈیشنل ڈپٹی کمشنر ارشاد خان مہمند کے مطابق ملک میں غیر قانونی رہائش پذیر غیر ملکیوں کی ملک بدری کا سلسلہ جاری ہے، آج 3 ہزار 514 غیر ملکیوں کو طورخم سرحد کے راستے جبری طور پر ملک بدر کیا گیا۔
ارشاد خان مہمند نے بتایا کہ 2 ہزار 758 غیر قانونی رہائش پذیر غیر ملکی رضاکارانہ طور پر لنڈیکوتل ٹرانزٹ کیمپ لائے گئے ، رضاکارانہ طور پر آنے والے غیر ملکی خاندانوں کی لنڈی کوتل ٹرانزٹ کیمپ میں قانونی کارروائی ہوئی۔
اے ڈی سی ارشاد خان مہمند کے مطابق پنجاب کے مختلف شہروں سے گرفتار 756 غیر قانونی غیر ملکیوں کو سیدھا طورخم منتقل کردیا گیا، پشاور جمعہ خان ٹرانزٹ کیمپ سے بھی 59 گرفتار غیر ملکیوں کو طورخم سرحد کے راستے ملک بدر کیا گیا۔
انھوں نے بتایا کہ ٹرانزٹ کیمپ آنے والوں میں 1561 افرادبغیر دستاویزات کے مقیم جبکہ 1197 افراد اے سی سی کارڈ ہولڈرز تھے، یکم اپریل سے لیکر اب تک 33 ہزار 258 غیر قانونی غیر ملکی افراد کو ملک بدر کیا گیا۔