ٹک ٹاکر مسٹر پتلو کی مہندی کے دوران بھگدڑ، ایک شخص جاں بحق، 13 زخمی

سیالکوٹ کے اسپورٹس اسٹیڈیم میں ٹک ٹاکر مسٹر پتلو کی مہندی کی تقریب کے دوران بھگدڑ مچنے سے ایک شخص جاں بحق جبکہ 13 افراد زخمی ہوگئے۔

واقعہ ایک انعامی تقریب کے دوران پیش آیا، جہاں گیٹ مقررہ وقت سے پہلے کھول دیے گئے، جس کے باعث وہاں موجود افراد میں افراتفری پھیل گئی۔

ریسکیو حکام کے مطابق بھگدڑ کے نتیجے میں متعدد افراد زخمی ہوئے، جنہیں فوری طور پر طبی امداد کے لیے اسپتال منتقل کیا گیا۔

اس دوران 30 سالہ عقیل زخموں کی تاب نہ لاتے ہوئے اسپتال منتقلی کے دوران دم توڑ گیا۔

واقعے کے بعد پولیس نے بھگدڑ کا مقدمہ درج کرلیا ہے، جس میں ٹک ٹاکر مسٹر پتلو سمیت 9 افراد کو نامزد کیا گیا ہے، جبکہ 40 سے 45 نامعلوم افراد کو بھی مقدمے میں شامل کیا گیا ہے۔

پولیس نے واقعے میں مبینہ طور پر ملوث 6 ملزمان کو گرفتار کرلیا ہے۔