گوجرانوالہ کے حلقہ این اے 77 اور ساہیوال کے حلقے پی پی 203 میں ضمنی انتخاب، پولنگ جاری

قومی اسمبلی کے حلقہ این اے 77 اور چیچہ وطنی کے صوبائی اسمبلی کے حلقہ پی پی 203 میں ضمنی انتخابات کے لیے پولنگ کا عمل جاری ہے، دونوں حلقوں میں امن و امان برقرار رکھنے کے لیے سیکیورٹی کے سخت انتظامات کیے گئے ہیں۔

ضمنی انتخابات کے دوران کسی بھی ناخوشگوار واقعے سے بچنے اور امن و امان کی صورتِ حال برقرار رکھنے کے لیے دونوں حلقوں میں دفعہ 144 نافذ کی گئی ہے۔

پولنگ کا آغاز صبح 8 بجے ہوا ہے جو شام 5 بجے تک بغیر کسی وقفے کے جاری رہے گی۔ الیکشن کمیشن کی جانب سے دونوں حلقوں میں انتخابی انتظامات مکمل کیے گئے ہیں۔

حلقہ این اے 77 گوجرانوالہ میں 11 امیدوار انتخابی میدان میں ہیں جبکہ 5 لاکھ 18 ہزار 620 رجسٹرڈ ووٹرز اپنا حق رائے دہی استعمال کر رہے ہیں۔ اس حلقے میں ووٹنگ کے لیے 333 پولنگ اسٹیشنز قائم کیے گئے ہیں۔

دوسری جانب حلقہ پی پی 203 ساہیوال، جس میں چیچہ وطنی کا علاقہ شامل ہے، میں 7 امیدوار مدمقابل ہیں۔ اس حلقے میں رجسٹرڈ ووٹرز کی تعداد 2 لاکھ 58 ہزار 122 ہے جبکہ مجموعی طور پر 185 پولنگ اسٹیشنز قائم کیے گئے ہیں۔

چیچہ وطنی میں انتخابی عمل کی نگرانی کے لیے 1100 پولیس اہلکار تعینات کیے گئے ہیں جبکہ خواتین ووٹرز کی سہولت کے لیے خواتین پولیس اہلکار بھی ڈیوٹی انجام دے رہی ہیں۔ کسی بھی ہنگامی صورتِ حال سے نمٹنے کے لیے پولیس کی اضافی نفری اور دیگر سیکیورٹی فورسز کو بھی تیار رکھا گیا ہے۔

واضح رہے کہ قومی اسمبلی کی نشست این اے 77 مسلم لیگ ن کے رکن محمود بشیر ورک جبکہ صوبائی اسمبلی کی نشست پی پی 203 رکن اسمبلی محمد حنیف جٹ کے انتقال کے باعث خالی ہوئی تھی۔