شرمیلا ٹیگور نے اسلام کیوں قبول کیا؟ سیف علی خان کی بہن کا حیران کن انکشاف

بالی ووڈ اداکارہ شرمیلا ٹیگور نے 1968 میں سابق بھارتی کرکٹ کپتان منصور علی خان پٹودی سے شادی سے قبل اسلام قبول کرکے اپنا نام عائشہ رکھ لیا تھا۔ اب کئی دہائیوں بعد صبا علی خان نے انکشاف کیا ہے کہ والدہ نے مذہب تبدیل کرنے کا فیصلہ کیوں کیا تھا اور اس کے پیچھے کیا وجوہات تھیں۔ صبا، سیف علی خان کی بہن اور شرمیلا کی بڑی بیٹی ہیں۔

شرمیلا ٹیگور اور منصور علی خان پٹودی کی شادی اس وقت غیر معمولی واقعات میں شمار ہوتی تھی کیونکہ دونوں کا تعلق مختلف مذاہب سے تھا۔ شادی سے پہلے شرمیلا کے اسلام قبول کرنے اور نام تبدیل کرکے عائشہ رکھنے کے معاملے پر بھی خاصی توجہ دی گئی تھی۔ اب صبا علی خان نے ایک انٹرویو میں بتایا ہے کہ ان کی والدہ کا یہ فیصلہ محض ذاتی پسند کا معاملہ نہیں تھا بلکہ اس کے پیچھے اس دور کے قانونی تقاضے اور پٹودی خاندان کی روایات بھی شامل تھیں۔

بھارتی اداکار اور میزبان سدھارتھ کنن سے گفتگو کرتے ہوئے صبا علی خان نے کہا کہ اس زمانے میں شادی کے لیے اس زمانے میں مذہب کی تبدیلی ایک ضرورت تھی اور یہ ایسا معاملہ نہیں تھا جس میں اپنی مرضی سے اس شرط کو قبول کرنے یا نہ کرنے کا فیصلہ کیا جاسکتا بلکہ شادی کے لیے مذہب تبدیل کرنا ضروری سمجھا جاتا تھا۔

ان کا کہنا تھا کہ اس اقدام سے شادی کو قانونی حیثیت حاصل ہوئی اور بچوں کی قانونی حیثیت بھی واضح ہوگئی۔

انہوں نے مزید کہا کہ اس فیصلے کے پیچھے پٹودی خاندان کی روایات اور توقعات بھی اہم تھیں۔ صبا کے بقول ان کی دادی کسی دوسری صورت میں اس شادی کی اجازت نہیں دیتیں۔

تاہم صبا نے واضح کیا کہ ان کے والد منصور علی خان پٹودی یا ان کے خاندان نے شرمیلا ٹیگور پر اپنا نام تبدیل کرنے یا پاسپورٹ سمیت دیگر سرکاری دستاویزات میں عائشہ نام درج کرانے کے لیے زور نہیں دیا تھا۔

ان کا کہنا تھا کہ اسلام قبول کرنے کے فیصلے سے ان کی والدہ کی شخصیت یا پیشہ ورانہ زندگی پر کوئی اثر نہیں پڑا اور فلمی دنیا میں شرمیلا ٹیگور کے نام سے ہی انکی شناخت برقرار رہی۔

شرمیلا ٹیگور کا فلمی کیریئر اور ذاتی زندگی دونوں ہی اپنے دور کے روایتی سماجی تصورات سے مختلف فیصلوں کی وجہ سے توجہ کا مرکز رہے۔ 1960 کی دہائی میں وہ میگزین فوٹو شوٹ کے لیے بکنی پہننے والی بھارتی فلمی اداکاراؤں میں بھی شامل تھیں، جس پر اُس وقت خاصی بحث ہوئی تھی۔

منصور علی خان پٹودی سے ان کے تعلق اور شادی کو بھی اس وقت مختلف حلقوں میں تنقید کا سامنا کرنا پڑا تھا۔ شرمیلا ٹیگور نے ماضی میں بتایا تھا کہ شادی کے موقع پر انہیں دھمکی آمیز ٹیلی گرام بھی موصول ہوئے تھے، جن میں ایک پیغام میں گولیاں چلانے اور مار دینے کی دھمکی دی گئی تھی۔

شرمیلا ٹیگور اور منصور علی خان پٹودی کے تین بچے ہیں، جن میں اداکار سیف علی خان، صبا علی خان اور اداکارہ سوہا علی خان شامل ہیں۔ منصور علی خان پٹودی 2011 میں پھیپھڑوں کے انفیکشن میں مبتلا ہونے کے بعد 70 برس کی عمر میں انتقال کر گئے تھے۔

صبا علی خان کے اس انٹرویو نے شرمیلا ٹیگور اور منصور علی خان پٹودی کی شادی سے جڑے پرانے واقعات اور مذہب کی تبدیلی کے فیصلے کو ایک بار پھرسب کی توجہ کا مرکز بنا دیا ہے۔