خیبر پختونخوا؛ پولیس آپریشن میں انتہائی مطلوب دہشتگرد کمانڈر سیف اللہ ہلاک

خیبر پختونخوا کے باڑہ شیخان میں پولیس کارروائی کے دوران متعدد سنگین مقدمات میں مطلوب مبینہ دہشتگرد کمانڈر سیف اللہ ہلاک ہوگیا، جبکہ مقابلے میں دو پولیس اہلکار معمولی زخمی ہوگئے۔

پولیس کے مطابق ہلاک ہونے والا سیف اللہ مختلف سنگین مقدمات میں اشتہاری تھا اور طویل عرصے سے افغانستان میں مقیم تھا۔

وہ افغانستان سے ایک گروہ کے کمانڈر کی حیثیت سے دہشتگردی کی کارروائیوں کے لیے پاکستان آیا تھا۔

پولیس کا دعویٰ ہے کہ سیف اللہ میدانک کے علاقے میں متعدد پولیس چیک پوسٹوں پر براہِ راست حملوں میں ملوث تھا، جبکہ جمرود کے علاقے علی مسجد میں ہونے والے آئی ای ڈی دھماکوں میں بھی اس کا کردار تھا۔

پولیس مقابلے کے دوران دو اہلکاروں کو معمولی خراشیں آئیں، جنہیں موقع پر ابتدائی طبی امداد فراہم کردی گئی۔

آئی جی خیبرپختونخوا ذوالفقار حمید نے مطلوب کمانڈر کے خلاف کامیاب کارروائی پر پولیس اہلکاروں کی کارکردگی کو سراہتے ہوئے انہیں شاباش دی۔

ان کا کہنا تھا کہ صوبے کو دہشتگردی سے پاک کرنے تک دہشتگردوں کے خلاف آپریشنز جاری رہیں گے۔