بلوچستان کے مختلف علاقوں میں سکیورٹی فورسز کے دہشت گردوں کے خلاف انٹیلی جنس بیسڈ آپریشنز کے دوران بھارتی حمایت یافتہ فتنہ الہندوستان کے 8 دہشت گرد ہلاک کر دیے گئے، جن میں ایک خودکش بمبار بھی شامل ہے جب کہ دہشت گردوں کے حملے میں پاک فوج کے 2 جوان بھی شہید ہوگئے ہیں۔

پاک فوج کے شعبہ تعلقات عامہ (آئی ایس پی آر) کے مطابق 13 نومبر سے بلوچستان کے مختلف علاقوں کوئٹہ، کولپور، قردگاپ اور نوشکی میں سیکیورٹی فورسز کے دہشت گردوں کے خلاف انٹیلی جنس بیسڈ آپریشنز جاری ہیں۔ کوئٹہ تفتان قومی شاہراہ این 40 کو مقامی ٹریفک کے لیے محفوظ بنانے کی غرض سے سیکیورٹی فورسز کی پٹرولنگ اور علاقے میں تسلط قائم رکھنے کی کارروائیاں بھی جاری ہیں۔

آئی ایس پی آر کے مطابق کولپور میں رات گئے سیکیورٹی فورسز نے کامیاب کارروائی کرتے ہوئے بھارتی سرپرستی میں سرگرم فتنہ الہندوستان کے 8 دہشت گردوں کو ہلاک کردیا، جن میں ایک خودکش حملہ آور بھی شامل تھا جب کہ کارروائی کے دوران دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا گیا۔

آئی ایس پی آر نے بتایا کہ 14 نومبر کو فتنہ الہندوستان کے دہشت گردوں نے مسلح کواڈ کاپٹرز کے ذریعے گشت پر مامور فوجی گاڑیوں کو نشانہ بنایا تاہم حملے میں پاک فوج کے میجر عمر منہاس ناصر اور حوالدار محمد عدنان خان نے جامِ شہادت نوش کیا۔

آئی ایس پی آر کے مطابق شہید میجر عمر منہاس ناصر کا تعلق ضلع چکوال جب کہ حوالدار محمد عدنان خان کا تعلق کوٹلی ستیاں سے تھا۔

ترجمان پاک فوج کا کہنا ہے کہ دہشت گرد حملے سیکیورٹی فورسز کے عزم کو متزلزل نہیں کرسکتے، دہشت گردی کے خطرے کے مکمل خاتمے تک متاثرہ علاقوں میں کلیئرنس آپریشنز جاری رکھے جائیں گے۔

پاک فوج کا مزید کہنا ہے کہ دہشت گردوں کو بھارت اور دیگر دشمن انٹیلی جنس ایجنسیوں کی پشت پناہی حاصل ہے، دہشت گرد ڈرونز، بارودی مواد اور جدید ٹیکنالوجی کے ذریعے کارروائیوں میں ملوث ہیں جب کہ بھارت انہیں مسلسل مالی معاونت اور جدید آلات فراہم کررہا ہے۔

آئی ایس پی آر کے مطابق سیکیورٹی فورسز دہشت گردوں کی بدلتی حکمت عملی سے پوری طرح آگاہ ہیں اور انہیں کسی صورت کارروائی کی آزادی نہیں دی جائے گی، قومی ایکشن پلان پر وفاقی ایپکس کمیٹی کے منظور کردہ وژن عزم استحکام کے تحت دہشت گردی کے خلاف کارروائیاں پوری رفتار سے جاری رہیں گی۔

ترجمان پاک فوج نے کہا کہ سیکیورٹی فورسز اور قانون نافذ کرنے والے ادارے ملک سے غیر ملکی سرپرستی میں ہونے والی دہشت گردی کے خاتمے کے لیے پرعزم ہیں۔ شہداء کی قربانیاں دہشت گردی کے مکمل خاتمے کے قومی عزم کو مزید مضبوط کرتی ہیں۔

صدر کا سیکیورٹی فورسز کو خراج تحسین

دوسری جانب صدرِ مملکت آصف علی زرداری نے بھی بلوچستان کے مختلف علاقوں میں دہشت گردوں کے خلاف کامیاب کارروائیوں پر سیکیورٹی فورسز کو خراجِ تحسین پیش کیا اور بھارتی سرپرستی میں سرگرم فتنہ الہندوستان کے 8 دہشت گردوں کو ہلاک کرنے پر سیکیورٹی فورسز کی پیشہ ورانہ صلاحیتوں کو سراہا۔

صدرِ مملکت نے دہشت گردوں کے حملے میں جامِ شہادت نوش کرنے والے میجر عمر منہاس ناصر اور حوالدار محمد عدنان خان کو خراجِ عقیدت پیش کیا اور شہدا کے اہلِ خانہ سے دلی تعزیت اور ہمدردی کا اظہار کیا۔

آصف زرداری نے کہا کہ غیر ملکی سرپرستی میں جاری دہشت گردی کے خلاف جنگ میں افواجِ پاکستان کے افسران اور جوانوں کی قربانیاں پوری قوم کے لیے باعثِ فخر ہیں، شہداء کی قربانیاں دہشت گردی کے مکمل خاتمے کے قومی عزم کو مزید مضبوط کرتی ہیں، دہشت گردوں کے بزدلانہ حملے ہمارے سیکیورٹی اداروں کے حوصلے پست نہیں کرسکتے۔

وزیراعظم کا سیکیورٹی فورسز کو خراج تحسین

ادھر وزیراعظم شہباز شریف نے بلوچستان کے علاقوں کولپور، قردگاپ اور نوشکی میں بھارتی سرپرستی میں سرگرم دہشت گرد تنظیم ’فتنۃ الہندوستان‘ کے خلاف کامیاب انٹیلی جنس بیسڈ آپریشنز پر سیکیورٹی فورسز کو خراج تحسین پیش کیا ہے۔

​وزیراعظم نے کوئٹہ-تفتان قومی شاہراہ (N-40) پر معمول کے گشت کے دوران جام شہادت نوش کرنے والے بہادرسپوتوں، میجرعمرمنہاس ناصر اور حوالدار محمد عدنان خان کو شان دار الفاظ میں خراج عقیدت پیش کیا۔

شہباز شریف نے شہدا کے درجات کی بلندی اور سوگوار خاندانوں کے لیے صبرِ جمیل کی دعا کرتے ہوئے کہا کہ پوری قوم اپنے شہدا کی لازوال قربانیوں کو سلام پیش کرتی ہے۔

ان کا مزید کہنا تھا کہ ​ دشمن معصوم شہریوں اور سیکیورٹی اہلکاروں کو نشانہ بنا کر خطے کا امن سبوتاژ کرنے کی مذموم کوشش کر رہے ہیں، تاہم ہماری مسلح افواج دشمن کے ہر ناپاک منصوبے کو خاک میں ملانے کی بھرپور صلاحیت رکھتی ہیں۔ انہوں نے کہا کہ بیرونی سرپرستی میں ہونے والی دہشت گردی کے مکمل خاتمے تک آپریشنز پوری قوت کے ساتھ جاری رہیں گے۔

وزیرداخلہ کا ڈرون حملے میں شہید پاک فوج کے جوانوں کو خراج عقیدت

وفاقی وزیرداخلہ محسن نقوی نے بھی بلوچستان میں فتنہ الخوارج کے دہشت گردوں کے ڈرون حملے میں شہید میجر عمر منہاس ناصر اور شہید حولدار عدنان خان کو خراج عقیدت پیش کیا اور دونوں شہدا کے لواحقین سے دلی ہمدردی و تعزیت کا اظہار کیا۔

محسن نقوی نے کہا کہ میجر عمر منہاس ناصر اور حولدار عدنان خان نے فرض کی ادائیگی میں شہادت کا عظیم رتبہ پایا، شہید میجر عمر اور شہید حولدار عدنان کا عزم اور جذبہ ہی قوم کی اصل قوت ہے، ہمارے شہدا کے خون کا ایک ایک قطرہ وطن کے تحفظ کی ضمانت ہے، شہدا ہمیشہ ہمارے دلوں میں زندہ رہیں گے۔

وفاقی وزیرداخلہ محسن نقوی نے خودکش بمبار سمیت 8 دہشت گردوں کو جہنم واصل کرنے پر سیکیورٹی فورسز کی پیشہ وارانہ صلاحیتوں کو بھی سراہا۔

اس سے قبل آئی ایس پی آر نے بتایا تھا کہ شمالی وزیرستان کے مختلف علاقوں میں سیکیورٹی فورسز نے انٹیلی جنس معلومات کی بنیاد پر آپریشنز کرتے ہوئے 16 دہشت گردوں کو ہلاک کردیا۔

علی خیل میں انٹیلی جنس بیسڈ آپریشن کے دوران 2 افغان باشندوں سمیت 12 دہشت گرد ہلاک کیے گئے اور میر علی اور دتہ خیل میں کارروائیوں کے دوران مزید 4 خوارج کو ہلاک کیا گیا جب کہ کارروائیوں کے دوران ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا۔

فائرنگ کے تبادلے میں پاک فوج کے 2 جوان حوالدار عصمت علی اور نائیک آفتاب علی نے جام شہادت نوش کیا۔ شہید حوالدار عصمت علی کا تعلق صوابی جب کہ شہید نائیک آفتاب علی کا تعلق مردان سے تھا۔