بچے کی ولدیت اور ڈی این اے ٹیسٹ پر عدالت کا بڑا فیصلہ

لاہور ہائیکورٹ کے جج جسٹس اسد علی باجوہ نے بچے کی ولدیت اور ڈی این اے ٹیسٹ سے متعلق ایک اہم فیصلے میں قرار دیا ہے کہ نکاح کے دوران پیدا ہونے والے بچے کی قانونی حیثیت کو محض ایک فریق کی جانب سے کرائے گئے نجی ڈی این اے ٹیسٹ کے ذریعے تبدیل نہیں کیا جا سکتا۔

عدالت نے واضح کیا کہ ماں کی رضامندی اور قانونی اجازت کے بغیر بچے کے جسمانی نمونے لے کر خفیہ طور پر ڈی این اے ٹیسٹ کرانا بنیادی حقوق اور انسانی عزت و وقار کے منافی ہے، اس لیے ایسے ٹیسٹ کو بچے کی ولدیت متنازع بنانے کے لیے قابلِ قبول قرار نہیں دیا جا سکتا۔

یہ فیصلہ جسٹس اسد علی باجوہ کی عدالت میں دائر کی جانے والی ایک آئینی درخواست پر سنایا گیا، جس میں فیملی کورٹ اور ایڈیشنل ڈسٹرکٹ جج گوجرانوالہ کے فیصلوں کو چیلنج کیا گیا تھا۔

درخواست گزار کا مؤقف تھا کہ نجی ڈی این اے ٹیسٹ کے مطابق بچہ اس کا نہیں ہے، لہٰذا اس پر ماہانہ نان و نفقہ کی ادائیگی لاگو نہیں ہوتی۔

عدالت نے فریقین کے دلائل سننے اور قانونی تقاضوں کا جائزہ لینے کے بعد درخواست گزار کی پٹیشن خارج کر دی، جس سے ماتحت عدالتوں کے وہ فیصلے بحال ہو گئے جن میں بچے کا ماہانہ خرچہ مقرر کیا گیا تھا۔

عدالت کی جانب سے جاری کردہ فیصلے میں اس امر پر زور دیا گیا ہے کہ ڈی این اے ٹیسٹ محض کسی سائنسی سہولت یا فریقین کی ذاتی خواہش پر نہیں کرایا جا سکتا، بلکہ ایسا قدم اٹھانے سے پہلے بچے کے بہترین مفاد، اس کی عزتِ نفس، رازداری اور ذہنی و جذباتی تحفظ کا جائزہ لینا لازمی ہے۔

عدالت نے آئین کے آرٹیکل 14، 4 اور 9 کا حوالہ دیتے ہوئے کہا کہ قانون ہر شہری کو انسانی وقار، نجی زندگی کے تحفظ اور جسمانی خودمختاری کی ضمانت دیتا ہے، اور کسی بھی شخص کو قانونی طریقہ کار سے ہٹ کر اس میں مداخلت کی اجازت نہیں دی جا سکتی۔

فیصلے میں قانونی اصول واضح کرتے ہوئے کہا گیا ہے کہ درست نکاح کے دوران چھ قمری ماہ سے زائد مدت میں پیدا ہونے والا بچہ قانون کی نظر میں شوہر کی ہی قانونی اولاد تصور ہوتا ہے، اور اگر کوئی والد اس کی ولدیت کو چیلنج کرنا چاہے تو اسے پیدائش کے بعد چالیس روز کے اندر قانونی چارہ جوئی کرنا ہوتی ہے۔

عدالت نے قرار دیا کہ پیدائش کے چار ماہ سے زائد عرصے بعد کرایا گیا کوئی بھی نجی ڈی این اے ٹیسٹ ولدیت کے تنازع میں قانونی طور پر ناقابلِ قبول ہے۔

عدالتی فیصلے کے تحت نابالغ بچے کا ماہانہ نان و نفقہ 25 ہزار روپے مقرر کرنے کا فیصلہ برقرار رکھا گیا ہے، جس میں سالانہ دس فیصد اضافے کی ہدایت بھی شامل ہے۔

عدالت نے یہ بھی واضح کیا کہ بچے کے نان و نفقہ میں خوراک، لباس، رہائش، تعلیم، علاج معالجے کے ساتھ ساتھ اس کی جسمانی، ذہنی اور جذباتی نشوونما کے تمام اخراجات شامل ہیں، اور والد محض دستاویزی ثبوت پیش نہ کرنے کی بنیاد پر اس ذمہ داری سے بری الذمہ نہیں ہو سکتا۔

اس کے علاوہ عدالت نے جہیز کے سامان کی واپسی سے متعلق ماتحت عدالتوں کے فیصلے کو بھی برقرار رکھتے ہوئے اس کی متبادل قیمت 9 لاکھ 70 ہزار روپے مقرر کرنے کا حکم بحال رکھا ہے۔

Related posts