برازیل کے ایمازون جنگلات میں دہائیوں سے الگ تھلگ رہنے والا قبیلہ اچانک سامنے آگیا

برازیل کے ایمازون جنگلات میں بیرونی دنیا سے رابطہ نہ رکھنے والے مقامی قبیلے کے تقریباً 20 افراد اچانک ایک قریبی آبادی کے نزدیک پہنچ گئے، جس کے بعد ان کی صحت اور تحفظ کے حوالے سے خدشات پیدا ہوگئے ہیں۔

خبر رساں ادارے ’ایسوسی ایٹڈ پریس‘ (اے پی) کے مطابق آوا قبیلے کے افراد پیر کو شمال مشرقی ریاست مارانیاو کے علاقے ارا ربوئیا میں ایک سرکاری چوکی اور گواخاجارا قبیلے کے گاؤں تواری کے قریب دیکھے گئے۔

برازیل کی وزارتِ امورِ مقامی آبادی نے منگل کو بتایا کہ حکام صورت حال کا جائزہ لے رہے ہیں اور ابتدائی اطلاعات کی تصدیق کی جا رہی ہے۔ آوا قبیلے کے افراد کئی دہائیوں سے بیرونی دنیا سے رابطہ کیے بغیر جنگل میں شکار، ماہی گیری اور خوراک جمع کرکے زندگی گزار رہے ہیں۔

ان کی اچانک آبادی کے قریب آمد کی وجہ تاحال واضح نہیں، تاہم ان کے علاقے میں غیر قانونی درختوں کی کٹائی، شکار اور دیگر مداخلتوں کے باعث ان کے قدرتی مسکن کو خطرات لاحق ہیں۔

پڑوسی گواخاجارا قبیلے کے افراد کی بنائی گئی ویڈیوز اور تصاویر میں آوا قبیلے کے مرد، خواتین اور بچے گھنی جھاڑیوں کے درمیان دکھائی دے رہے ہیں۔ بعض افراد کے ہاتھوں میں کمان اور تیر ہیں، جب کہ کچھ نے پروں سے بنے سرپوش اور گلے میں ہار پہن رکھے ہیں۔

حقوقِ مقامی آبادی کے لیے کام کرنے والی تنظیم سروائیول انٹرنیشنل کے مطابق آوا قبیلے کے افراد نے سرکاری ٹیم سے شکرقندی مانگی، جو انہیں فراہم کردی گئی، جس کے بعد وہ خوراک لے کر دوبارہ جنگل میں چلے گئے۔

تنظیم کے برازیلی شعبے سروائیول برازیل کی سربراہ سارہ شینکر نے اس واقعے کو ایک بحرانی لمحہ اور حکام کے لیے خطرے کی گھنٹی قرار دیا ہے۔ ان کا کہنا ہے کہ برازیل کی حکومت کو آوا قبیلے کے علاقے میں غیر قانونی مداخلت روکنے کے لیے سخت اقدامات کرنے چاہییں۔

ان کے مطابق اس ملاقات کی تصاویر ان الگ تھلگ قبائل کی موجودگی کا ثبوت بھی فراہم کرتی ہیں، جن کے وجود پر بعض اوقات ان کی زمینوں تک رسائی حاصل کرنے کے خواہش مند افراد سوال اٹھاتے ہیں۔

ارا ربوئیا کا علاقہ کئی دہائیوں سے غیر قانونی سرگرمیوں کی زد میں ہے۔ جنگلات کی کٹائی اور بیرونی افراد کی مداخلت کے باعث وہاں رہنے والے الگ تھلگ قبائل کے لیے اپنی روایتی زندگی برقرار رکھنا مشکل ہوتا جارہا ہے۔

اس صورت حال میں بیماریوں کا خطرہ بھی اہم تشویش ہے۔ بیرونی آبادی سے رابطہ نہ رکھنے والے مقامی افراد عام متعدی بیماریوں کے خلاف محدود مدافعت رکھتے ہیں، اس لیے معمولی انفیکشن بھی ان کی صحت کے لیے سنگین خطرہ بن سکتا ہے۔

سارہ شینکر کے مطابق گواخاجارا قبیلے کے افراد برسوں سے اپنے جنگلات کی نگرانی اور غیر قانونی مداخلت کے خلاف مزاحمت کررہے ہیں، تاہم ان کوششوں کے دوران برادری کے بعض افراد کو قتل بھی کیا گیا ہے۔ ان کا کہنا ہے کہ علاقے کے تحفظ کی بنیادی ذمہ داری برازیلی حکومت پر عائد ہوتی ہے۔

برازیل کی وزارتِ امورِ مقامی آبادی کے مطابق آوا قبیلہ پہلے ہی الگ تھلگ مقامی آبادیوں کے سرکاری ریکارڈ میں شامل ہے اور وفاقی ادارے فونائی کی ایک خصوصی ٹیم اس کی نگرانی کرتی ہے۔

حکام نے فونائی کے اہلکاروں اور مقامی صحت کے کارکنوں کو علاقے میں تعینات کردیا ہے، جب کہ ممکنہ رابطے کی صورت میں پیدا ہونے والے صحت کے خطرات کا جائزہ لینے کے لیے ہنگامی رابطہ کاری کا نظام بھی فعال کیا گیا ہے۔

وزارت نے واضح کیا ہے کہ حکومتی پالیسی ایسے قبائل سے رابطہ قائم کرنے کی حوصلہ افزائی نہیں کرتی، بل کہ ان کے الگ تھلگ رہنے اور خود یہ فیصلہ کرنے کے حق کا تحفظ کرتی ہے کہ انہیں بیرونی دنیا سے تعلق قائم کرنا ہے یا نہیں۔

حکام کے مطابق کسی مختصر ملاقات کا مطلب یہ نہیں کہ قبیلے نے اپنی تنہائی ختم کرنے یا مستقل رابطہ قائم کرنے کا فیصلہ کرلیا ہے۔

سروائیول انٹرنیشنل کے سابقہ تخمینے کے مطابق آوا قبیلے کے تقریباً 100 افراد اب بھی بیرونی دنیا سے الگ تھلگ رہتے ہیں، تاہم یہ تعداد موجودہ آبادی کا حتمی تخمینہ نہیں۔ آوا برادری کے کچھ دوسرے افراد ایسے دیہات میں بھی رہتے ہیں جہاں ان کا بیرونی دنیا سے رابطہ ہے۔

سارہ شینکر کا کہنا ہے کہ وہ چاہتی ہیں کہ آوا قبیلے کے افراد جنگل میں اپنی مرضی کے مطابق زندگی گزارتے رہیں اور انہیں بیرونی مداخلت کا سامنا نہ کرنا پڑے۔ ان کے بقول، اس قبیلے کی بقا کے لیے ضروری ہے کہ غیر متعلقہ افراد کو ان کے جنگلات سے مکمل طور پر دور رکھا جائے۔

Related posts