پاکستان اور قطر کے درمیان سیکیورٹی تعاون سمیت اہم معاہدوں پر دستخط

قطر کے وزیر داخلہ شیخ خلیفہ بن حمد بن خلیفہ الثانی نے وزیراعظم شہباز شریف اور فیلڈ مارشل سید عاصم منیر سے الگ الگ ملاقاتیں کیں، جن میں پاکستان اور قطر کے درمیان سیکیورٹی، انسداد دہشت گردی، تجارت، سرمایہ کاری اور توانائی سمیت مختلف شعبوں میں تعاون بڑھانے پر تبادلہ خیال کیا گیا جب کہ دونوں ممالک کے درمیان سیکیورٹی تعاون اور منشیات کی اسمگلنگ روکنے کے لیے اہم معاہدوں پر بھی دستخط کیے گئے۔

پاک فوج کے شعبہ تعلقات عامہ (آئی ایس پی آر) کے مطابق قطر کے وزیر داخلہ شیخ خلیفہ بن حمد بن خلیفہ الثانی نے راولپنڈی میں فیلڈ مارشل سید عاصم منیر سے ملاقات کی، جس میں باہمی دلچسپی کے امور، علاقائی و عالمی سلامتی کی بدلتی صورت حال اور دوطرفہ سیکیورٹی تعاون بڑھانے کے امکانات پر تبادلہ خیال کیا گیا۔

آئی ایس پی آر کے مطابق ملاقات کے دوران دونوں جانب سے پاکستان اور قطر کے درمیان دوطرفہ تعلقات مزید مضبوط بنانے کے عزم کا اعادہ کیا گیا۔ بالخصوص سیکیورٹی، انسداد دہشت گردی اور ادارہ جاتی تعاون کے شعبوں میں روابط بڑھانے کی اہمیت پر زور دیا گیا۔

آئی ایس پی آر کےمطابق قطری وزیر داخلہ نے علاقائی امن و استحکام کے فروغ میں پاکستان کے کردار کو سراہا اور دونوں ممالک کے درمیان دیرینہ برادرانہ تعلقات کی اہمیت کو تسلیم کیا۔

اس موقع پر فیلڈ مارشل سید عاصم منیر نے قطر کے ساتھ دوطرفہ روابط مزید گہرے کرنے کے پاکستان کے عزم کا اعادہ کیا اور مشترکہ سیکیورٹی چیلنجز سے نمٹنے کے لیے دونوں ممالک کے درمیان قریبی تعاون کی اہمیت پر بھی زور دیا۔

وزیراعظم سے قطری وزیر داخلہ کی ملاقات

قبل ازیں وزیراعظم شہباز شریف سے بھی قطر کے وزیر داخلہ شیخ خلیفہ بن حمد بن خلیفہ آل ثانی نے وفد کے ہمراہ اسلام آباد میں ملاقات کی، جس میں پاکستان اور قطر کے دوطرفہ تعلقات، سیکیورٹی تعاون، توانائی، تجارت اور سرمایہ کاری سمیت مختلف شعبوں میں تعاون بڑھانے پر تبادلہ خیال کیا گیا۔

وزیراعظم نے قطری وزیر داخلہ کے پہلے دورہ پاکستان کا پرتپاک خیرمقدم کرتے ہوئے دونوں ممالک کے دیرینہ برادرانہ تعلقات کا اعادہ کیا جب کہ انہوں نے امید ظاہر کی کہ اس دورے سے پاکستان اور قطر کی وزارت داخلہ اور متعلقہ اداروں کے درمیان تعاون مزید مستحکم ہوگا۔

شہباز شریف نے قطر کے امیر کے لیے نیک خواہشات کا اظہار کیا اور پاکستان کے لیے قطری قیادت کی مسلسل حمایت پر شکریہ ادا کیا۔ انہوں نے قطر کی جانب سے مائع قدرتی گیس کی مسلسل فراہمی کو سراہتے ہوئے کہا کہ قطری ایل این جی پاکستان کی توانائی ضروریات پوری کرنے میں اہم کردار ادا کررہی ہے۔

وزیراعظم نے مزید کہا کہ تقریباً تین لاکھ پاکستانی قطر میں کام کررہے ہیں اور وہاں کی ترقی اور خوشحالی میں اہم کردار ادا کررہے ہیں۔

وزیراعظم نے پاکستان اور قطر کے درمیان اقتصادی تعاون بڑھانے کے وسیع مواقع کی نشاندہی کرتے ہوئے تجارت، سرمایہ کاری، زراعت، لائیو اسٹاک، انفارمیشن ٹیکنالوجی، کان کنی اور معدنیات کے شعبوں میں تعاون کو مزید فروغ دینے پر زور دیا۔

ملاقات کے دوران وزیراعظم شہباز شریف نے قطر کی انٹرنل سیکیورٹی فورس لخویا اور پاکستان کی فیڈرل کانسٹیبلری کے درمیان سیکیورٹی تعاون سے متعلق مفاہمتی یادداشت پر دستخط کی تقریب کا مشاہدہ کیا جب کہ دونوں ممالک کے درمیان منشیات کی اسمگلنگ کی روک تھام کے لیے ایکشن پلان پر بھی دستخط کیے گئے۔

پاکستان کی جانب سے وفاقی وزیر داخلہ سید محسن رضا نقوی اور قطر کی جانب سے وزیر داخلہ شیخ خلیفہ بن حمد بن خلیفہ الثانی نے متعلقہ دستاویزات پر دستخط کیے۔

وزیراعظم شہباز شریف نے قطر سے آنے والے اعلیٰ سطح کے وفد کے اعزاز میں ظہرانے کا بھی اہتمام کیا۔

Related posts