گلوکارہ شازیہ منظور کے گھر پر مسلح افراد کا مبینہ حملہ

پاکستانی گلوکارہ شازیہ منظور نے الزام عائد کیا ہے کہ لاہور میں ان کے گھر پر مسلح افراد نے حملہ کیا اور زبردستی قبضے کی کوشش کی۔ گلوکارہ کے مطابق انہیں جان سے مارنے کی دھمکیاں بھی دی جا رہی ہیں، جس کے بعد انہوں نے پولیس سے تحفظ فراہم کرنے کی درخواست کردی ہے۔

میڈیا رپورٹس کے مطابق شازیہ منظور کا گھر لاہور کے علاقے ملت پارک میں واقع ہے۔ گلوکارہ نے اس واقعے کے حوالے سے ملت پارک تھانے میں تحریری درخواست جمع کرائی ہے، جس میں انہوں نے الزام لگایا ہے کہ انہیں گھر پر زبردستی قبضے اور جان سے مارنے کی دھمکیاں دی جا رہی ہیں۔

شازیہ منظور نے اپنی درخواست میں اپنے منیجر نواز اور ان کے بچوں پر بھی جائیداد کے معاملے پر دھمکانے اور ہراساں کرنے کا الزام عائد کیا ہے۔

گلوکارہ کے مطابق جائیداد سے متعلق قانونی تنازع پہلے ہی عدالت میں زیرِ سماعت ہے، تاہم اس معاملے کے دوران انہیں مسلسل پریشان کیا جا رہا ہے اور مبینہ طور پر تشدد اور دھمکیوں کا سامنا بھی ہے۔

شازیہ منظور کے وکیل نے بھی پولیس کو واقعے سے آگاہ کیا ہے، جبکہ گلوکارہ نے پنجاب پولیس سے مطالبہ کیا ہے کہ انہیں تحفظ فراہم کیا جائے اور مبینہ طور پر ملوث افراد کے خلاف کارروائی کی جائے۔

شازیہ منظور کا شمار پاکستان کی معروف گلوکاراؤں میں ہوتا ہے۔ انہوں نے فلمی گیتوں کے ذریعے خاص شہرت حاصل کی اور اپنی منفرد آواز کی بدولت ملک اور بیرونِ ملک مداحوں میں مقبول ہوئیں۔

انہوں نے’بتیّاں بجھائی رکھ دی‘، ’چن میرے مکھنا‘، ’بلے بلے‘ اور ’بنٹو‘ جیسے کئی سپرہٹ گانے گائے۔ وہ آج بھی موسیقی کی دنیا میں سرگرم ہیں اور مختلف بین الاقوامی تقریبات، میوزک شوز اور میلوں میں پاکستان کی نمائندگی کرتی نظرآتی ہیں۔

Related posts