پاکستان سپرلیگ (پی ایس ایل) 10 کے 12 ویں میچ میں ملتان سلطانز نے لاہور قلندرز کو 33 رنز سے شکست دے کر رواں سیزن میں پہلی کامیابی حاصل کرلی۔
ملتان میں کھیلے جارہے میچ میں ملتان سلطانز کے کپتان محمد رضوان نے ٹاس جیت کر پہلے بیٹنگ کا فیصلہ کیا جو درست ثابت ہوا اور ملتان سلطانز نے پہلے بیٹنگ کرتے ہوئے یاسر خان کی جارحانہ بلے بازی کی بدولت مقررہ 20 اوورز میں 5 وکٹوں کے نقصان پر 228 رنز بنائے۔
ہدف کے تعاقب میں سکندر رضا کے علاوہ لاہور قلندرز کا کوئی بھی بلے باز زیادہ دیر وکٹ پر نہ رک سکا، پوری ٹیم مقررہ 20 اوورز میں 9 وکٹوں کے نقصان پر 195 رنز بناسکی۔
لاہور قلندرز بیٹنگ
229 رنز کے ہدف کے تعاقب میں لاہور قلندرز کی جانب سے فخرزمان نے ٹیم کو جارحانہ آغاز فراہم کیا لیکن وہ زیادہ لمبی اننگز نہ کھیل سکے اور 14 گیندوں پر 32 رنز بنانے کے بعد آؤٹ ہوئے۔
محمد نعیم 11 رنز بناسکے، عبداللہ شفیق 18 رنز کے مہمان ثابت ہوئے، ڈیرل مچل بھی 19 رنز ہی بناسکے، رشاد حسین اور شاہین آفریدی 2،2 جب کہ آصف آفریدی 4 رنز بناکر آؤٹ ہوئے۔
سیم بلنگز نے 23 گیندوں پر 43 رنز کی اننگز کھیلی جب کہ سکندر رضا نے 26 گیندوں پر 50 رنز کی اننگز کھیلی۔
ملتان سلطانز کی جانب سے عبید شاہ نے 3، اسامہ میر اور مائیکل بریسویل نے 2،2 جب کہ جوش لٹل اور ڈیوڈ ویلے نے ایک ایک وکٹ حاصل کی۔
ملتان سلطانز کی اننگز
اس سے قبل ملتان سلطانز کی جانب سے دیگر میچوں کے مقابلے میں اس میچ میں نئی اوپنگ جوڑی نے جارحانہ آغاز فراہم کیا، یاسر خان اور محمد رضوان نے 7 اوورز میں 89 رنز کی شراکت قائم کی۔
محمد رضوان 17 گیندوں پر 32 رنز بناکر آؤٹ ہوئے، عثمان خان نے بھی 24 گیندوں پر 39 رنز کی اننگز کھیلی، ایشٹن ٹرنر 15 اور مائیکل بریسویل 9 رنز بناکر آؤٹ ہوئے۔
تاہم، شائے ہوپ کی جگہ ٹیم میں جگہ بنانے والے یاسر خان نے اپنے رواں سیزن میں اپنے پہلے ہی میچ میں نصف سینچری اسکور کی، وہ 6 چھکوں اور اتنے ہی چوکوں کی مدد سے 44 گیندوں پر 87 رنز بناکر آؤٹ ہوئے۔
افتخار احمد نے آخری لمحات میں جارحانہ کھیل پیش کیا، وہ 18 گیندوں پر 3 چھکوں اور اتنے ہی چوکوں کی مدد سے 40 رنز بناکر ناٹ آؤٹ رہے۔
لاہور قلندرز کی جانب سے قلندرز کی جانب سے رشاد حسین نے 2 جبکہ آصف آفریدی، سکندر رضا اور شاہین شاہ آفریدی نے 1، 1 وکٹ حاصل کی جبکہ حارث رؤف سب سے 3 اوورز میں 54 رنز دے کر سب سے مہنگے بولر ثابت ہوئے۔
میچ کا ٹاس
ملتان کرکٹ اسٹیڈیم میں کھیلے جارہے میچ میں ملتان سلطانز کے کپتان محمد رضوان نے ٹاس جیت کر پہلے خود بیٹنگ کرنے کا فیصلہ کیا۔
میچ میں لاہور قلندرز کی جانب سے ٹیم میں کوئی تبدیلی نہیں کی گئی ہے جبکہ ملتان سلطانز نے 2 تبدیلیاں کی ہیں، عاقف جاوید اور شائے ہوپ کی جگہ ٹیم میں یاسر خان اور جوشوا لٹل کو ٹیم میں شامل کیا ہے۔
ملتان سلطانز اسکواڈ
ملتان سلطان کی ٹیم میں محمد رضوان قیادت کررہے ہیں، اس کے علاوہ یاسر خان، عثمان خان، کامران غلام، مائیکل بریسویل، افتخار احمد، ایشٹن ٹرنر، ڈیوڈ ولی، اسامہ میر، عبید شاہ اور جوشوا لٹل اسکواڈ کا حصہ ہیں۔
لاہور قلندرز اسکواڈ
لاہور قلندرز کی ٹیم کپتان شاہین شاہ آفریدی کے علاوہ فخر زمان، محمد نعیم، عبداللہ شفیق، ڈیرل مچل، سیم بِلنگز (وکٹ کیپر)، سکندر رضا، رشاد حسین، حارث رؤف، زمان خان، آصف آفریدی پر مشتمل ہے۔
یاد رہے کہ ملتان سلطانز کی ٹیم نے اب تک ایونٹ میں کوئی کامیابی حاصل نہیں کی، اسے تینوں میچوں میں شکست کا سامنا کرنا پڑا اور پوائنٹس ٹیبل پر آخری نمبر پر موجود ہے۔
ملتان سلطانز کو پہلے میچ میں کراچی کنگز کے ہاتھوں 4 وکٹوں کی شکست کا سامنا کرنا پڑا اور دوسرے میچ میں اسلام آباد یونائیٹڈ نے ملتان سلطانز کو 47 رنز سے شکست دی جب کہ تیسرے میچ میں پشاور زلمی نے 120 رنز سے شکست دی۔
دوسری جانب ٹورنامنٹ کے افتتاحی میچ میں اسلام آباد یونائیٹڈ کے ہاتھوں شکست کے بعد لاہور قلندرز بقیہ دونوں میچز جیتنے میں کامیاب رہی ہے اور لاہور قلندرز کے 3 میچز میں 4 پوائنٹس ہیں۔