نئی دہلی میں ایس سی او سولائزیشن ڈائیلاگ کا آغاز: پاکستان اور بھارت دو الگ شناختیں ہیں، مصدق ملک

بھارتی دارالحکومت نئی دہلی میں شنگھائی تعاون تنظیم (ایس سی او) کے تحت سولائزیشن ڈائیلاگ فورم کا آغاز آج سے ہو رہا ہے، جس میں پاکستان کی نمائندگی وفاقی وزیر برائے موسمیاتی تبدیلی مصدق ملک کر رہے ہیں۔

بائیس نومبر تک جاری رہنے والے اس فورم میں ایس سی او کے 10 رکن ممالک شریک ہیں، جن میں پاکستان، بھارت، روس، ایران، بیلاروس اور وسط ایشیائی ریاستیں شامل ہیں۔

اجلاس کے موقع پر بھارتی میڈیا سے مکالمے کے دوران وفاقی وزیر مصدق ملک نے پاکستان اور بھارت کی الگ قومی شناختوں کی اہمیت پر زور دیا اور دو قومی نظریے کا حوالہ دیتے ہوئے کہا کہ حقیقی مکالمہ ہمیشہ الگ اور ممتاز شناختوں کے درمیان ہوتا ہے۔

ان کا کہنا تھا کہ یکسانیت کی صورت میں مکالمے کے بجائے محض یک طرفہ گفتگو کی گنجائش رہ جاتی ہے۔

مصدق ملک نے مزید کہا کہ پاکستان اور بھارت دو الگ خودمختار ریاستیں ہیں اور مشترکہ تہذیبی و تاریخی روابط کے باوجود دونوں ممالک کی قومی شناختیں جداگانہ ہیں۔

وفاقی وزیر کے مطابق خطے میں بامعنی اور باہمی مکالمے کو آگے بڑھانے کے لیے دونوں ممالک کی جداگانہ قومی شناخت کو تسلیم کرنا ضروری ہے۔

شنگھائی تعاون تنظیم کے اس تہذیبی مکالمے کا مقصد رکن ممالک کے درمیان ثقافتی اور سماجی روابط کو فروغ دینا ہے، جہاں علاقائی ممالک کے نمائندے باہمی دلچسپی کے امور پر تبادلہ خیال کر رہے ہیں۔

Related posts