اسلام آباد ہائیکورٹ میں چار لاپتہ بھائیوں کی بازیابی سے متعلق کیس کی سماعت کے دوران جذباتی مناظر دیکھنے میں آئے جب لاپتہ بچوں کی والدہ کمرہ عدالت میں روتے روتے نڈھال ہو گئیں اور زمین پر گر پڑیں۔ موقع پر موجود لیڈی پولیس اہلکاروں اور خواتین وکلا نے خاتون کو سنبھالا اور پانی پلایا۔
کیس کی سماعت جسٹس محمد آصف نے کی ، سماعت کے دوران عدالت کو بتایا گیا کہ چاروں بھائیوں کے بارے میں تاحال کوئی سراغ نہیں مل سکا۔ اسلام آباد اور پنجاب پولیس کی جانب سے بازیابی میں ناکامی پر عدالت نے سخت اظہارِ برہمی کیا۔
درخواست گزار کے وکیل نے بتایا کہ واقعے کو ایک سال چار ماہ ہو چکے ہیں، لیکن پولیس کی جانب سے اب تک کوئی پیش رفت نہیں ہوئی۔ وکیل نے نشاندہی کی کہ تین پولیس اہلکاروں کو نامزد کیا گیا تھا لیکن ان کی گرفتاری عمل میں نہیں لائی گئی۔
عدالت نے استفسار کیا کہ اب تک کیا پیش رفت ہوئی ہے؟ اس پر ڈی آئی جی اسلام آباد پولیس جواد طارق اور ایس ایس پی پنجاب پولیس نے عدالت کو بتایا کہ سیف سٹی راولپنڈی سے مدد لی گئی ہے اور اسپیشل انویسٹی گیشن ٹیم تشکیل دی گئی ہے۔
ڈی آئی جی نے کہا کہ نامزد اہلکار تفتیش میں شامل نہیں ہوئے، اب ان کی گرفتاری کے لیے وارنٹ حاصل کیے جائیں گے۔ جس پر جسٹس محمد آصف نے ریمارکس دیتے ہوئے کہا کہ وارنٹ تو کب کے لے لینے چاہیے تھے یہ اہلکار بار بار عدالت میں پیش ہو رہے ہیں اگر ہمارے ساتھ ایسا ہو جائے تو پھر ہم کیا کریں گے؟
عدالت نے پولیس حکام کی کارکردگی پر سخت عدم اطمینان کا اظہار کرتے ہوئے کہا ہر تین چار دن بعد کوئی نہ کوئی لاپتہ ہونے کا کیس آتا ہے اور پھر بتایا جاتا ہے کہ وہ خود گھومنے گئے تھے ایسا رویہ ناقابل قبول ہے۔
ڈائریکٹر لیگل اسلام آباد پولیس طاہر کاظم نے مؤقف اختیار کیا کہ کئی افراد نے واپس آ کر بیان دیا ہے کہ وہ خود چلے گئے تھے، لیکن عدالت نے اس مؤقف کو مسترد کر دیا۔
لاپتہ افراد کیس: ’بندے پیش کریں نہیں تو سی سی پی او اور آئی جی کیخلاف کارروائی کریں گے‘
ایس ایس پی پنجاب پولیس نے عدالت کو یقین دہانی کرائی کہ نامزد پولیس اہلکاروں کے وارنٹ تعمیل کے ساتھ پیش کیے جائیں گے اور آئندہ سماعت پر مکمل رپورٹ دی جائے گی۔
عدالت نے کیس کی سماعت آئندہ تاریخ تک ملتوی کرتے ہوئے کہا کہ اس معاملے پر تفصیلی حکم جاری کیا جائے گا۔