ڈونلڈ ٹرمپ کے تیسری مرتبہ امریکی صر بننے کی قیاس آرائیاں جاری تھیں، تاہم اب ٹرمپ نے خود ہی اس کی وضاحت پیش کردی۔
غیر ملکی میڈیا کے مطابق صدر ڈونلڈ ٹرمپ نے 2028 میں تیسری مدت صدارت کے لیے انتخابات لڑنے کی خبروں کی تردید کر دی ہے۔
ٹرمپ، جو 2017 سے 2021 تک امریکہ کے 45ویں صدر رہ چکے ہیں اور 2024 میں ایک مرتبہ پھر صدارت پر فائز ہوئے، نے گزشتہ دنوں اپنے کچھ بیانات اور ’ٹرمپ 2028‘ کیپز کے باعث قیاس آرائیوں کو جنم دیا تھا کہ وہ تیسری بار بھی امریکی اقتدار سنبھالے گیں۔
امریکی صدر نے حالیہ انٹرویو میں اس حوالے سے واضح طور پر کہا کہ میں صرف دو مدت کے لیے صدر بننا چاہتا ہوں، امریکی آئین بھی اسی کی اجازت دیتا ہے۔
تاہم ٹرمپ نے اب کہا ہے کہ یہ باتیں صرف میڈیا کو تنگ کرنے کے لیے کی گئیں تھیں اور ان کا تیسری مدت کے لیے انتخاب لڑنے کا کوئی ارادہ نہیں۔
امریکی صدر کا کہنا تھا کہ تیسری بار صدر بننے کا کوئی ارادہ نہیں، شاندار کام کرنے کے لیے چار سال کافی ہیں۔
انہوں نے مزید کہا کہ میں ہمیشہ سے مانتا ہوں کہ دو مدت کافی ہیں، اور یہی آئینی دائرہ کار ہے۔
سیاسی ماہرین نے بھی اس بات کی تصدیق کی ہے کہ امریکی آئین کے مطابق کوئی بھی شخص دو مدت سے زیادہ صدر نہیں بن سکتا، اس لیے 2028 میں ٹرمپ کی واپسی آئینی طور پر ممکن نہیں۔
ٹرمپ نے نائب صدر جے ڈی وینس اور وزیرخارجہ مارکو روبیو سمیت اپنے ممکنہ متبادل امیدواروں کے نام بھی گنوادیے۔