وزیراعلیٰ خیبرپختونخوا علی امین گنڈا پور نے ملاکنڈ ڈویژن کو 2 الگ ڈویژنز بنانے کا اعلان کردیا۔
پشاور میں وزیراعلیٰ خیبرپختونخوا علی امین گنڈاپور کی زیر صدارت میں آئندہ مالی سال کے ترقیاتی پروگرام کی تیاری کے بارے میں مشاورتی اجلاس ہوا۔
اجلاس میں ملاکنڈ ڈویژن کے اگلے سالانہ ترقیاتی پروگرام کی تیاری کے لیے طویل مشاورت ہوئی اور اجلاس میں ملاکنڈ کے قومی اور صوبائی اسمبلی کے اراکین صوبائی نے شرکت کی۔
اجلاس میں ملاکنڈ ڈویژن کے عوام کے لیے وزیر اعلیٰ خیبرپختوںخوا کا اہم اقدام سامنے آیا، علی امین گنڈاپور نے ملاکنڈ ڈویژن کو 2 الگ ڈویژنز بنانے کا اعلان کیا۔
علی امین گنڈا پور کا کہنا تھا کہ ملاکنڈ بہت وسیع رقبے پر پھیلا ہوا پہاڑی علاقہ ہے، لوگوں کی سہولت کے لیے اسے 2 ڈویژنز میں تقسیم کرنا ضروری ہے، انتظامی یونٹس چھوٹے ہونے سے سروس ڈیلیوری اور گورننس میں بہتری آئے گی۔
انہوں نے کہا کہ ملاکنڈ ڈویژن کے منتخب عوامی نمائندے آپس میں مشاورت کرکے دو الگ الگ ڈویژنز کے قیام کے لIے جزئیات طے کریں۔
دوسری جانب ملاکنڈ ڈویژن کے منتخب عوامی نمائندوں نے وزیراعلیٰ علی امین گنڈا پور کے اس اعلان کا خیر مقدم کیا، ان کا کہنا تھا کہ ڈویژن کو دو ڈویژنز میں تقسیم کرنا علاقے کا عوام کا دیرینہ مطالبہ تھا اور وقت کی اشد ضرورت تھی، ہم اس اعلان پر وزیر اعلیٰ کے تہہ دل سے مشکور ہیں۔
علاوہ ازیں اجلاس میں ملاکنڈ ڈویژن کے رواں سالانہ ترقیاتی پروگرام پر پیشرفت کا بھی جائزہ لیا۔