سیکیورٹی فورسز نے خیبرپختونخوا اور بلوچستان میں مختلف کارروائیوں کے دوران بھارتی حمایت یافتہ 12 دہشت گردوں کو ہلاک کردیا جبکہ کارروائیوں کے دوران پاک فوج کے 2 بہادر جوان بھی شہید ہوگئے۔
خیبرپختونخوا میں 9 دہشت گرد ہلاک
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 17 اور 18 مئی کے دوران صوبہ خیبر پختونخوا میں بھارتی حمایت یافتہ فتنہ الخوارج گروپوں کے خلاف مختلف کارروائیاں کیں، جس کے نیتجے میں 9 خوارج مارے گئے۔
آئی ایس پی آر کے مطابق سیکیورٹی فورسز نے ضلع لکی مروت میں انٹیلی جنس بیسڈ آپریشن کیا، جس کے دوران سیکیورٹی اہلکاروں نے خوارج کے ٹھکانے کو مؤثر طریقے سے نشانہ بنایا، جس کے نتیجے میں 5 بھارتی اسپانسرڈ خوارجیوں کو ہلاک کردیا گیا۔ اسی طرح ضلع بنوں میں ایک اور انٹیلی جنس بیسڈ آپریشن میں 2 بھارتی اسپانسرڈ مارے گئے۔
آئی ایس پی آر کے مطابق شمالی وزیرستان کے علاقے میر علی میں خوارج نے سیکیورٹی فورسز کے قافلے پر گھات لگا کر حملہ کیا، جس کے بعد سیکیورٹی فورسز اور خوارج دہشت گردوں کے درمیان فائرنگ کا شدید تبادلہ ہوا، سیکیورٹی اہلکاروں کی جوابی کارروائی میں 2 بھارتی اسپانسرڈ خوارج مارے گئے۔
آئی ایس پی آر کے مطابق کارروائیوں کے دوران شدید فائرنگ کے تبادلے میں کرم کے 29 سالہ سپاہی فرہاد علی طوری اور کوہاٹ کے 32 سالہ لانس نائیک صابر آفریدی بہادری سے لڑتے ہوئے شہید ہوگئے۔
ترجمان پاک فوج کا کہنا ہے کہ علاقے میں پائے جانے والے کسی ممکنہ خوارجی کو ختم کرنے کے لیے کلئیرنس آپریشن بھی کیا گیا کیونکہ سیکیورٹی فورسز بھارتی پراکسیوں کی طرف سے پھیلائی جانے والی دہشت گردی کو ختم کرنے کے لیے پرعزم ہیں، اور بہادر سپاہیوں کی یہ قربانیاں ہمارے عزم کو مزید مضبوط کرتی ہیں۔
بلوچستان میں 3 دہشت گرد ہلاک
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 17 اور 18 مئی کو بلوچستان میں خفیہ اطلاع پر 2 الگ الگ کارروائیوں کے دوران بھارت کے حمایت یافتہ دہشت گرد گروہ نام نہاد بلوچ لبریشن فرنٹ (بی ایل ایف) سے تعلق رکھنے والے 3 دہشت گرد ہلاک کردیے گئے، کارروائیاں آواران اور کیچ کے اضلاع میں کی گئیں۔
آئی ایس پی آر کے مطابق سیکیورٹی فورسز نے خفیہ معلومات کی بنیاد پر ضلع آواران کے علاقے گِشکور میں انٹیلی جنس بیسڈ آپریشن کیا، آپریشن بھارتی اسپانسرڈ دہشت گردوں کی موجودگی کی اطلاع پر کیا گیا۔
آپریشن کے دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا جبکہ شدید فائرنگ کے تبادلے میں ایک دہشت گرد ہلاک اور 2 دہشت گرد زخمی ہوئے جنہیں گرفتار کرلیا گیا، بھارتی اسپانسرڈ ہلاک دہشت گرد کی شناخت یونس کے نام سے ہوئی۔
آئی ایس پی آر کے مطابق سیکیورٹی فورسز نے دوسری کارروائی ضلع کیچ کے شہر تربت میں کی، جہاں سیکیورٹی فورسز اور دہشت گردوں میں جھڑپ ہوئی، جھڑپ کے دوران 2 بھارتی اسپانسرڈ دہشت گرد مارے گئے، جن کی شناخت دہشت گرد سرغنہ صابر اللہ اور دہشت گرد امجد عرف بیچو کے نام سے ہوئی۔
آئی ایس پی آر نے بتایا کہ ہلاک دہشت گردوں سے اسلحہ، گولہ بارود اور دھماکا خیز مواد بھی برآمد کیا گیا، مارے گئے دہشت گرد قانون نافذ کرنے والے اداروں کے خلاف دہشت گردی کی متعدد کارروائیوں کے ساتھ ساتھ معصوم شہریوں کی ٹارگٹ کلنگ میں بھی ملوث تھے۔
ترجمان پاک فوج کا کہنا ہے کہ آپریشنز کے بعد علاقے میں کلیئرنس آپریشن جاری ہے تاکہ کسی بھی باقی ماندہ دہشت گرد کو ختم کیا جا سکے۔
ترجمان کا مزید کہنا ہے کہ پاکستان کی سیکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی بھارتی پراکسیوں کی تمام کوششوں کو ناکام بنانے کے لیے پرعزم ہیں۔
وزیراعظم کا بلوچستان میں 3 دہشتگردوں کی ہلاکت پر سیکیورٹی فورسز کو خراج تحسین
دوسری جانب وزیراعظم شہباز شریف نے بلوچستان میں 3 دہشت گردوں کی ہلاکت پر سیکیورٹی فورسز کو خراج تحسین پیش کرتے ہوئے سیکیورٹی فورسز کی پیشہ ورانہ مہارت کی پزیرائی کی۔
وزیراعظم نے کہا کہ بلوچستان میں نہتے شہریوں کی جان و مال کو خطرے میں ڈالنے کی بھارتی سازش بے نقاب ہوگئی، بھارت کے پاکستان میں امن وامان کو نقصان پہنچانے کے مذموم عزائم کو خاک میں ملادیں گے، حکومت اور سیکیورٹی فورسز ملک سے دہشت گردی کے مکمل خاتمے کے لیے پرعزم ہیں۔
صدر کا بلوچستان میں 3 دہشتگردوں کو ہلاک کرنے پر سیکیورٹی فورسز کو خراج تحسین
صدر مملکت آصف علی زرداری نے بلوچستان میں 3 دہشت گردوں کو ہلاک کرنے پر سیکیورٹی فورسز کو خراج تحسین پیش کرتے ہوئے ان کی بہادری کو سراہا۔
صدر نے کہا کہ دہشت گردوں کے مکمل خاتمے تک سیکیورٹی فورسز کی کارروائیاں جاری رہیں گی، سیکیورٹی فورسز کا دہشت گردی کے خاتمے کے لیے کامیاب کاروائیاں کرنا خوش آئند ہے، دہشت گرد عناصر کے خاتمے، ملکی دفاع کے لیے ہمارا عزم غیرمتزلزل رہے گا۔
صدر مملکت آصف علی زرداری نے دہشت گردی کے مکمل خاتمے کے قومی عزم کا اظہار بھی کیا۔
وزیرداخلہ کا بلوچستان میں 3 دہشتگردوں کو ہلاک کرنے پر سیکیورٹی فورسز کو خراج تحسین
وفاقی وزیرداخلہ محسن نقوی نے بھی بلوچستان میں 3 دہشت گردوں کو جہنم واصل کرنے پر سیکیورٹی فورسز کو خراج تحسین پیش کیا ہے۔
محسن نقوی نے کہا کہ دہشت گردوں کو عبرتناک انجام تک پہنچانے پر سیکیورٹی فورسز کو شاباش دیتے ہیں، سیکیورٹی فورسز نے بروقت کارروائیاں کرکے دہشت گردوں کے ناپاک عزائم کو خاک میں ملایا، بلوچستان میں قیام امن کے لیے سیکیورٹی فورسز کے اقدامات قابل ستائش ہیں۔