9 مئی کے واقعات کی تحقیقات کا دائرہ مزید وسیع کر دیا گیا ہے۔ پنجاب پولیس کی خصوصی تفتیشی ٹیم اڈیالہ جیل راولپنڈی پہنچ گئی ہے، جہاں بانی پی ٹی آئی سے تفتیش کی جائے گی۔
ذرائع کے مطابق تفتیشی ٹیم بانی پی ٹی آئی کا پولی گرافک ٹیسٹ بھی کرے گی تاکہ 9 مئی کے پرتشدد واقعات سے متعلق حقائق سامنے آ سکیں۔
لاہور پولیس کی ٹیم ڈی ایس پی آصف جاوید کی سربراہی میں اڈیالہ جیل پہنچی، جس میں انسپکٹر محمد اسلم، انسپکٹر محمد عالم، انسپکٹر محمد ارحم اور پنجاب فارنزک یونٹ کے ماہر عابد ایوب بھی شامل ہیں۔
عمران خان کے پولی گرافک سمیت دیگر ٹیسٹ کی اجازت دینے کا تحریری فیصلہ جاری
جیل ذرائع کے مطابق تفتیشی ٹیم بانی پی ٹی آئی سے سوالات کے ساتھ ساتھ پولی گرافک ٹیسٹ کی تیاری مکمل کر چکی ہے۔ یہ ٹیسٹ 9 مئی کے حملوں، املاک کو نقصان پہنچانے اور عسکری تنصیبات پر حملوں سے متعلق حقائق جاننے کے لیے کلیدی کردار ادا کرے گا۔
عدالت نے عمران خان کا پولی گرافک اور فوٹو گرامیٹک ٹیسٹ کروانے کی اجازت دے دی
واضح رہے کہ 9 مئی کے مقدمات میں پولیس نے عمران خان کا پولی گرافک اور فوٹوگرافک ٹیسٹ کرانے کا فیصلہ کیا تھا جس کے لیے پراسیکیوشن نے انسداد دہشتگردی عدالت میں باقاعدہ درخواست جمع کرائی تھی۔لاہورکی انسدادِ دہشت گردی عدالت نے تمام فریقین کے مؤقف سننے کے بعدعمران خان کا پولی گرافک ٹیسٹ کروانے کی اجازت دی تھی۔
یاد رہے کہ 9 مئی 2023 کو ملک بھر میں فوجی تنصیبات اور سرکاری املاک پر حملوں کے سلسلے میں پی ٹی آئی قیادت کے خلاف کئی مقدمات درج کیے گئے تھے، جن میں بانی پی ٹی آئی کو مرکزی کردار کے طور پر نامزد کیا گیا ہے۔