اسلام آباد ، مری اور آزاد کشمیر میں بارش، موسم خوشگوار

ملک کے بالائی علاقوں میں آندھی، ژالہ باری اور موسلادھار بارشوں کا سلسلہ وقفے وقفے سے جاری ہے، جس کے باعث موسم خوشگوار ہو گیا ہے جبکہ کئی علاقوں میں معمولات زندگی متاثر ہوئے ہیں۔

اسلام آباد اور راولپنڈی میں آندھی اور تیز بارشوں کا سلسلہ وقفے وقفے سے جاری ہے۔ بلیو ایریا سمیت مختلف علاقوں میں ژالہ باری بھی ہوئی، جبکہ کالے بادلوں نے پورے شہر کو اپنی لپیٹ میں لے لیا۔ گرمی کی شدت میں نمایاں کمی آئی اور موسم کی اچانک تبدیلی نے شہریوں کو خوشگوار حیرت میں ڈال دیا۔

ملکہ کوہسار مری میں بھی موسلادھار بارش، گرج چمک اور آندھی کے باعث موسم مزید سرد ہو گیا۔ بارش کے بعد ندی نالوں میں طغیانی آ گئی اور سڑکیں تالاب کا منظر پیش کر رہی ہیں۔ بجلی کی فراہمی معطل ہو گئی ہے اور سیاح ہوٹلوں تک محدود ہو کر رہ گئے ہیں۔

پنجاب اور خیبر پختونخوا میں آج سے بارش کا امکان

آزاد کشمیر میں بھی موسم نے اچانک کروٹ لی۔ کالی گھٹاؤں کے برسنے سے دارالحکومت مظفرآباد سمیت مختلف علاقوں کا موسم سرد اور خوشگوار ہو گیا۔ گرمی کا زور ٹوٹ گیا اور شہریوں نے سکھ کا سانس لیا۔

پشاور اور گردونواح میں بھی آندھی اور تیز ہواؤں نے نظام زندگی کو متاثر کیا۔ متعدد علاقوں میں بجلی کی سپلائی معطل ہو گئی ہے۔

ادھر سوات اور مینگورہ میں شدید بارش اور ژالہ باری ہوئی جس کے بعد سیلابی صورتحال پیدا ہو گئی ، شدیدبارش کےباعث پانی گھروں اور دکانوں میں داخل ہو گیا اور ندی نالوں میں طغیانی ہو گئی جبکہ کئی علاقوں میں بجلی کی فراہمی بھی معطل ہو گئی ہے۔

ایبٹ آباد ،ہری پور،اٹک کے مختلف علاقوں میں بھی تیزآندھی و طوفان اور شدید بارش ہوئی،اسی طرح مردان کے علاقوں میں بھی تیز اور شدید بارش کے ساتھ ژالہ باری ہوئی ۔

کراچی میں گرمی کی لہر ،پارہ 38 ڈگری تک جانے کا امکان

بارشوں کے پیش نظر نیشنل ڈیزاسٹر مینجمنٹ اتھارٹی (این ڈی ایم اے) نے الرٹ جاری کر دیا ہے۔ اتھارٹی نے عوام کو محتاط رہنے اور غیر ضروری سفر سے گریز کرنے کی ہدایت کی ہے۔

این ڈی ایم اے نے عوام کو تاکید کی ہے کہ وہ طوفان اور شدید بارش کے دوران کھلی جگہوں، بجلی کے کھمبوں اور درختوں کے نیچے پناہ لینے سے گریز کریں اور متاثرہ علاقوں کی طرف سفر کرنے سے اجتناب کریں۔