صوبہ پنجاب میں شدید آندھی اور طوفانی موسم کے نتیجے میں جانی و مالی نقصانات کی ابتدائی رپورٹ جاری کر دی گئی ہے۔ پنجاب ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق مختلف اضلاع میں پیش آنے والے واقعات میں 14 شہری جاں بحق اور 101 افراد زخمی ہوئے ہیں۔
ترجمان کے مطابق جاں بحق افراد میں لاہور سے تین، راولپنڈی سے ایک، جہلم سے تین، شیخوپورہ، ننکانہ صاحب، سیالکوٹ اور میانوالی سے ایک، ایک فرد شامل ہے۔ اموات زیادہ تر بوسیدہ مکانات کے گرنے اور غیر محفوظ مقامات پر موجودگی کے باعث ہوئیں۔
بحیرہ عرب میں طوفان سے بھارت میں تباہی، دارالحکومت ڈوب گیا
پی ڈی ایم اے کے مطابق آندھی و طوفان کے سبب متعدد کچے اور کمزور مکانات کو نقصان پہنچا ہے، جب کہ لاہور میں درختوں کے گرنے اور سولر پینلز کو نقصان پہنچنے کے واقعات بھی رپورٹ ہوئے ہیں۔
پی ڈی ایم اے کے مطابق سب سے زیادہ بارش اٹک میں ریکارڈ کی گئی، جہاں 48 ملی میٹر بارش ہوئی۔ راولپنڈی کے علاقے شمس آباد میں 37 ملی میٹر، چکلالہ میں 27 ملی میٹر، اور کچہری میں 10 ملی میٹر بارش ریکارڈ کی گئی۔
لاہور میں بھی متعدد علاقوں میں بارش ہوئی، جن میں لاہور ایئرپورٹ پر 11 ملی میٹر، لکشمی چوک پر 3 ملی میٹر، جبکہ گلبرگ، اپر مال اور جیل روڈ پر 2 ملی میٹر بارش ریکارڈ کی گئی۔ اسی طرح میانوالی میں 13، عیسیٰ خیل اور چکوال میں 12، مری، نورپور تھل اور نارووال میں 11 ملی میٹر بارش ہوئی۔
ترجمان کے مطابق فیصل آباد، سیالکوٹ، گوجرانوالہ، جھنگ اور راجن پور سمیت دیگر اضلاع میں بھی ہلکی بارش رپورٹ ہوئی۔
پی ڈی ایم اے کا کہنا ہے کہ تمام ضلعی انتظامیہ اور ریسکیو ادارے الرٹ ہیں، اور متاثرہ علاقوں میں امدادی سرگرمیاں جاری ہیں۔
ریلیف کمشنر پنجاب نبیل جاوید نے زخمیوں کو فوری اور بہترین طبی امداد فراہم کرنے کی ہدایت کی ہے، جبکہ صوبے بھر کے کمشنرز، ڈپٹی کمشنرز اور تمام ریسکیو اداروں کو الرٹ رہنے کا حکم بھی جاری کیا گیا ہے۔ 1122 سمیت تمام امدادی اداروں کو مشینری اور عملے سمیت چوکنا رہنے کی ہدایت کی گئی ہے۔
ڈی جی پی ڈی ایم اے عرفان علی کاٹھیا کے مطابق حکومت پنجاب کی پالیسی کے تحت متاثرہ خاندانوں کو مالی معاونت دی جائے گی۔ انہوں نے بتایا کہ صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سنٹرز کو الرٹ کر دیا گیا ہے، اور کنٹرول روم میں صورتحال کی نگرانی 24 گھنٹے جاری ہے۔
ملک کے بیشتر علاقوں میں موسم گرم اور خشک رہنے کی پیش گوئی، شمالی علاقوں میں آج بھی بارش کا امکان
ڈی جی عرفان علی کاٹھیا نے شہریوں سے اپیل کی ہے کہ خراب موسم کی پیشگوئی کے دوران غیر ضروری سفر سے گریز کریں، بجلی کے کھمبوں اور لٹکتی تاروں سے دور رہیں، اور آسمانی بجلی کے دوران محفوظ مقامات پر پناہ لیں۔ انہوں نے خبردار کیا کہ گرج چمک اور تیز طوفان کی صورت میں کھلے آسمان تلے ہرگز نہ جائیں، اور بچوں کو بوسیدہ عمارتوں کے قریب نہ جانے دیں۔
پی ڈی ایم اے نے ایمرجنسی کی صورت میں شہریوں سے درخواست کی ہے کہ وہ فوری طور پر ہیلپ لائن 1129 پر رابطہ کریں۔