خیبرپختونخوا اسمبلی میں مبینہ کرپشن اور بھرتیوں کی چھان بین کا عمل مکمل کرلیا گیا، پی ٹی آئی احتساب کمیٹی نے رپورٹ بانی پی ٹی آئی عمران خان کو ارسال کردی۔
تفصیلات کے مطابق خیبرپختونخوا اسمبلی میں مبینہ کرپشن اور غیرقانونی بھرتیوں سے متعلق پی ٹی آئی احتساب کمیٹی کی چھان بین مکمل ہو گئی، کمیٹی نے اپنی رپورٹ عمران خان کو ارسال کردی۔
رپورٹ میں اسپیکر خیبرپختونخوا اسمبلی بابر سلیم کی جانب سے پارٹی منشور کے برخلاف اقدامات پر نظرثانی کی سفارش کی گئی ہے۔
کمیٹی نے کہا ہے کہ اسپیکر اسمبلی، اسمبلی کے حقوق اور اختیارات کے محافظ ہیں اور ان کا کردار آئینی و قانونی دائرہ کار میں آتا ہے۔
رپورٹ میں مزید کہا گیا ہے کہ اسپیکر قانونی طور پر کسی کے ماتحت نہیں ہیں اور احتساب کمیٹی انہیں کسی قسم کے احکامات جاری کرنے کی مجاز نہیں، تینوں کمیٹی ممبران نے اس بات پر متفقہ رائے دی کہ کمیٹی اسپیکر کو کوئی حکم جاری نہیں کر سکتی۔
رپورٹ میں مزید انکشاف کیا گیا ہے کہ 4 ملازمین سے متعلق خصوصی نظرثانی کی سفارش بھی کمیٹی نے کی ہے، ان سفارشات کا مقصد غیر شفاف تقرریوں کے خلاف مؤثر کارروائی کو یقینی بنانا ہے۔