چیف آف آرمی اسٹاف (سی او اے ایس) فیلڈ مارشل سید عاصم منیر، نشانِ امتیاز (ملٹری) نے عیدالاضحیٰ کے پہلے روز لائن آف کنٹرول (ایل او سی) پر اگلے مورچوں کا دورہ کیا اور فرنٹ لائن پر تعینات جوانوں کے ساتھ عیدالاضحیٰ منائی۔ ایل او سی پر آمد کے موقع پر چیف آف آرمی اسٹاف کا استقبال کمانڈر راولپنڈی کور نے کیا۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق دورے کا آغاز عید کی نماز سے ہوا، جس میں پاکستان کے پائیدار امن، استحکام اور خوشحالی کے لیے خصوصی دعائیں کی گئیں، نیز اُن شہداء کے لیے بھی دعائیں کی گئیں جنہوں نے وطنِ عزیز کے دفاع کے لیے اپنی جانوں کا نذرانہ پیش کیا۔
فیلڈ مارشل سید عاصم منیر نے افسران اور جوانوں کو عید کی دلی مبارکباد پیش کی اور ان کی غیر متزلزل وابستگی، پیشہ ورانہ مہارت اور مسلسل چیلنجز کے باوجود پائیدار خدمات کو سراہا۔
عید کے موقع پر پاک فوج کے شہدا کے لواحقین کے جذبات سے بھرپور پیغامات
انہوں نے کہا کہ اہلکاروں کا اپنے خاندانوں سے دور، محاذ پر عید منانا، مادرِ وطن کے دفاع کے عظیم قومی مقصد کی تکمیل ہے جو سال بھر جاری رہتی ہے۔
آرمی چیف نے ”معرکۂ حق“ اور ”آپریشن بنیان مرصوص“ کے دوران فارمیشن کی مثالی کارکردگی کو سراہا اور شہداء اور غازیوں کو خراجِ عقیدت پیش کیا جن کی قربانیاں قوم کے دفاع اور عزم کو مضبوط کرتی ہیں۔
انہوں نے کہا، ’آپ نے معصوم پاکستانی شہریوں بشمول بچوں، خواتین اور بزرگوں کی جانوں کے ضیاع کا دلیری اور مؤثر ردعمل کے ذریعے بھرپور بدلہ لیا۔‘
سپاہیوں سے گفتگو کرتے ہوئے آرمی چیف نے ان کے بلند حوصلے، بہترین جنگی تیاری اور بھارتی جنگ بندی کی خلاف ورزیوں کے مؤثر جواب میں ان کی چوکسی کو سراہا۔
وزیراعظم شہباز شریف کا ملائیشین ہم منصب کو ٹیلی فون، پاک بھارت کشیدگی پر حمایت کا شکریہ
انہوں نے مسلح افواج کی جنگی تیاریوں پر مکمل اعتماد کا اظہار کرتے ہوئے کہا کہ وہ کسی بھی جارحیت کو مؤثر طریقے سے روکنے اور شکست دینے کے لیے ہمہ وقت تیار ہیں۔
پاکستان کے اصولی مؤقف کو اجاگر کرتے ہوئے فیلڈ مارشل نے کہا کہ کشمیری عوام کی بھارتی قبضے کے خلاف منصفانہ اور دلیرانہ جدوجہد کو کبھی فراموش نہیں کیا جائے گا۔
انہوں نے جموں و کشمیر کے تنازع کے حل کی ضرورت پر زور دیا، جو کشمیری عوام کی امنگوں اور اقوامِ متحدہ کی سلامتی کونسل کی متعلقہ قراردادوں کے مطابق ہونا چاہیے۔