مخصوص نشتیں ہم سے لی گئیں، عدلیہ کا یہ اقدام سیاہ الفاظ میں لکھا جائے گا، عمر ایوب

قومی اسمبلی کے اپوزیشن لیڈر عمر ایوب کا کہنا ہے کہ مخصوص نشتیں ہم سے لی گئیں، عدلیہ کا یہ اقدام سیاہ الفاظ میں لکھا جائے گا، خیبر پختونخوا کا بجٹ عمران خان کی منظوری کے بعد منظور ہوا، صوبائی حکومت بجٹ پاس کرتی تو فاقی حکومت آرٹیکل 235 کے تحت فائنینشل ایمرجنسی لگا دیتی۔

ہری پور میں میڈیا سے گفتگو کرتے ہوئے پی ٹی آئی کے رہنما عمر ایوب نے کہا کہ اگر بجٹ منظور نہ کیا جاتا تو وفاقی گورنمنٹ آرٹیکل 235 کے تحت فائنینشل ایمرجنسی کے تحت ایمرجنسی لگا دیتی، خیبرپختونخوا حکومت کا بجٹ بانی پی ٹی آئی کی جانب سے فائنل ہونے کے بعد ہی منظور کیا گیا، ابھی اس پر گفٹ و شنید کا سلسلہ جاری ہے۔

عمر ایوب نے کہا کہ سوات سانحہ افسوس ناک ہے اس پر صوبائی حکومت کی جانب سے پوری ضلعی انتظامیہ سمیت دیگر اداروں کے افسران کے خلاف کاروائیاں کی گئیں ہیں، ان کو ہٹا دیا گیا ہے۔

اپوزیشن لیڈر کا کہنا تھا کہ مون سون کے اس موسم میں سیاحوں کو بھی احتیاط کرنی چاہیئے، کسی ایسے علاقے یا ایسے مقام پر نہ جائیں، جہاں سے کسی بھی وقت سیلابی ریلوں کی آمد کے خطرات ہوں۔

انہوں نے مزید کہا کہ مخصوص نشتیں ہم سے لی گئیں، ہمارے وکلا کے ساتھ انتہائی ہتک آمیز رویہ رکھا گیا، یہ سارا ایک ایجنڈا ہے، جس پر کام کیا جارہا ہے، عدلیہ کا یہ اقدام سیاہ الفاظ میں لکھا جائے گا، یہ ہائبرڈ رجیم ہے ہم کسی صورت بانی پی ٹی آئی سے نہیں ہٹیں گے، ہم مکمل طور پر بانی پی ٹی آئی کے ساتھ اسی طرح موجود ہیں اور موجود رہیں گے، ان کے تمام حربے ناکام ہوتے رہیں گے۔