راولپنڈی: جنوبی افریقہ کی ایئر فورس کے سربراہ لیفٹیننٹ جنرل وائز مین سیمو مبامبو نے جوائنٹ اسٹاف ہیڈکوارٹرز راولپنڈی میں چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران دوطرفہ دلچسپی کے امور، دفاعی تعاون اور فوجی روابط کے فروغ پر تبادلہ خیال کیا گیا۔ دونوں معزز شخصیات نے افواج کے درمیان تعاون کو مزید وسعت دینے کے لیے عملی اقدامات پر گفتگو کی، جبکہ عالمی و علاقائی جغرافیائی سیاسی منظرنامے پر بھی خیالات کا تبادلہ کیا گیا۔
چیئرمین جوائنٹ چیفس آف اسٹاف کمیٹی نے جنوبی افریقی مہمان کو خطے کی سیکیورٹی صورتحال پر پاکستان کا مؤقف پیش کیا اور خطے میں امن و استحکام کے لیے پاکستان کی کوششوں کو اجاگر کیا۔
دورے پر آئے لیفٹیننٹ جنرل وائز مین سیمو مبامبو نے پاکستان کی مسلح افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کو خراجِ تحسین پیش کیا۔
ملاقات سے قبل جوائنٹ اسٹاف ہیڈکوارٹرز آمد پر معزز مہمان کو تینوں افواج کے چاق و چوبند دستے نے گارڈ آف آنر پیش کیا۔