انٹرنیشنل کرکٹ کونسل (آئی سی سی) میں بھارتی اجارہ داری میں اضافہ ہوگیا، چیئرمین جے شاہ کے بعد ایک اور اہم عہدے پر ایک بھارتی کو تعینات کردیا گیا۔
پیر کے روز بھارت کے معروف اسپورٹس براڈکاسٹر کے سینئر عہدیدار سنجوگ گپتا کو آئی سی سی کا نیا چیف ایگزیکٹو افسر (سی ای او) مقرر کردیا گیا۔
سنجوگ گپتا آئی سی سی کے 7 ویں سی ای او ہوں گے اور وہ جیف ایلر ڈائس کی جگہ لیں گے، جنہوں نے 4 سالہ مدت کے بعد جنوری میں استعفیٰ دے دیا تھا۔
اس سے قبل سنجوگ گپتا جیو اسٹار کے اسپورٹس اور لائیو ایونٹس کے چیف ایگزیکٹو کے طور پر کام کر رہے تھے۔
آئی سی سی کے چیئرمین جے شاہ نے کہا کہ گپتا کھیلوں کی حکمت عملی اور تجارتی پہلوؤں کا وسیع تجربہ رکھتے ہیں، جو آئی سی سی کے لیے بے حد قیمتی ثابت ہوگا۔
آئی سی سی کے مطابق اس عہدے کے لیے دنیا بھر کے 25 ممالک سے 2500 سے زائد درخواستیں موصول ہوئیں، جنہیں مسترد کردیا گیا۔
سنجوگ گپتا نے اپنے بیان میں کہا کہ یہ کرکٹ کے لیے نہایت پُرجوش وقت ہے، جب عالمی مقابلے بلند مقام حاصل کر رہے ہیں، تجارتی راستے وسیع ہو رہے ہیں اور خواتین کی کرکٹ تیزی سے مقبولیت حاصل کر رہی ہے۔
انہوں نے مزید کہا کہ کرکٹ کا 2028 کے لاس اینجلس اولمپکس میں شامل ہونا اور ٹیکنالوجی کا تیزی سے فروغ کرکٹ کی عالمی ترقی کے لیے ایک اہم محرک ثابت ہو سکتا ہے۔