کراچی کے علاقے ڈیفنس فیز 6 اتحاد کمرشل میں واقع فلیٹ سے شوبز سے وابستہ خاتون کی لاش برآمد ہوئی جبکہ پولیس نے کارروائی کے لیے لاش اسپتال منتقل کردی۔
ایس ایچ او گذری فاروق سنجرانی نے بتایا کہ کراچی ڈیفنس فیز 6 اتحاد کمرشل لین نمبر 5 میں قائم رہائشی عمارت کی تیسری منزل کے فلیٹ سے خاتون کی لاش ملی جو تقریباً 20 سے 25 دن پرانی تھی، ڈی این اے سیمپلز کی مدد سے شناخت ممکن ہوسکے گی، سانحہ خاتون ایک فلیٹ میں 7 سال سے رہ رہی تھیں، خاتون گھر میں اکیلی رہتی تھیں، خاتون کی شناخت 35 سالہ حمیرا اصغر علی کے نام سے کی گئی جس کا تعلق شوبز تھا اور وہ مذکورہ فلیٹ میں اکیلی ہی رہائش پذیر تھی۔
ایس ایچ او کے مطابق ابتدائی تحقیقات میں معلوم ہوا ہے کہ متوفیہ حمیرا اصغر علی مذکورہ فلیٹ میں 2018 سے کرایے پر رہائش پذیر تھیں اور 2024 سے انہوں نے کرایہ دینا بند کر دیا تھا جس کے بعد مالک مکان نے عدالت سے رجوع کیا تھا۔
انہوں نے بتایا کہ عدالت کے حکم پر فلیٹ خالی کرانے کے لیے بیلف نے پولیس سے رابطہ کیا اور اس کے بعد پولیس ان کے ہمراہ فلیٹ پر پہنچی تو فلیٹ کا دروازہ اندر سے بند تھا جس سے توڑ کر اندر گئے تو خاتون کی تعفن زدہ لاش کمرے میں پڑی ملی، جس پر کرائم سین یونٹ کو طلب کر کے شواہد حاصل کیے گئے۔
ایس ایچ او نے بتایا کہ خاتون کی لاش کو ضابطے کی کارروائی کے لیے جناح اسپتال منتقل کر دیا گیا جبکہ پولیس نے مذکورہ فلیٹ کو سیل بھی کر دیا ہے۔
فاروق سنجرانی نے مزید بتایا کہ فلیٹ کا دروازہ اندر سے بند تھا جبکہ فوری طور پر ہلاکت کی وجہ معلوم نہیں ہو سکی تاہم شبہ ہے کہ خاتون کی ہلاکت طبعی طور پر ہوئی ہو، خاتون کا پوسٹ مارٹم کرایا جائیے گا جس کی رپورٹ آنے کے بعد ہی وجہ موت کا حتمی تعین کیا جا سکے گا۔
ان کا کہنا تھا کہ پولیس کا متوفیہ کے کسی بھی رشتے دار سے کوئی رابطہ نہیں ہوا اور اس حوالے سے پولیس مزید تحقیقات کر رہی ہے۔