محکمہ داخلہ کی جانب سے رپورٹ میں کہا گیا ہے کہ بلوچستان میں 6 ماہ کے دوران دہشتگردی کے 501 واقعات میں257 افراد جاں بحق ہوئے، ان واقعات میں 492 افراد زخمی ہوئے۔ صوبائی محکمہ داخلہ نے اعدادوشمار جاری کردیے۔
صوبائی محکمہ داخلہ کی جانب سے جاری اعداد و شمار کے مطابق بلوچستان میں چھ ماہ میں دہشتگردی کے 501 واقعات پیش آئے جن میں 257 افراد جاں بحق اور 492 زخمی ہوئے، جبکہ غیر مقامی افراد پر 14 حملوں میں 52 ہلاک ہوئے۔
محکمہ داخلہ بلوچستان کی رپورٹ میں ان حقائق کا انکشاف کیا گیا کہ بم دھماکوں، دستی بمز، آئی ای ڈیز اور بارودی سرنگوں کے 81 واقعات میں 26 افراد شہید اور 112 زخمی ہوئے۔
رپورٹ کے مطابق اسی مدت میں ٹرین پر دو حملوں میں 29 مسافر ہلاک ہوئے۔ عام شہریوں کو نشانہ بنانے والے 39 حملوں میں 11 افراد جاں بحق اور 29 زخمی ہوئے۔
بلوچستان کے محکمہ داخلہ کے یکم جنوری سے 30 جون تک ششماہی اعداد وشمار کے مطابق دہشت گردی کے واقعات میں نمایاں تیزی رہی اور دہشت گردی کے واقعات میں 45 فیصد جبکہ سیٹلرز کی ٹارگٹ کلنگ میں 100فیصد اضافہ ہوا۔
گزشتہ 6 ماہ کے دوران عام شہریوں پر حملے کے 39 واقعات میں 11 افراد جاں بحق جبکہ 29 زخمی ہوئے، اس کے علاوہ پولیو ورکز پر ہونے والے ایک حملے میں ایک ورکر جان سے گیا جبکہ موبائل فون ٹاورز پر حملے کے 9 واقعات میں دو افراد زخمی ہوئے ہیں۔