وفاقی حکومت نے فرنٹیئر کانسٹیبلری (ایف سی) کو ملک گیر فیڈرل فورس میں تبدیل کرنے کا فیصلہ کرلیا، وفاقی کابینہ سے فرنٹیئر کانسٹیبلری ایکٹ 1915 میں ترامیم کی منظوری دی جائے گی۔
تفصیلات کے مطابق فرنٹیئر کانسٹیبلری کو ملک گیر فیڈرل فورس میں تبدیل کرنے کا فیصلہ کرلیا گیا، ذرائع کے مطابق وفاقی حکومت کی جانب سے ایف سی کو ملک گیر وفاقی فورس میں توسیع دینے کا فیصلہ کیا گیا ہے۔
اس فیصلے پر عمل درآمد کے لیے وفاقی کابینہ کی طرف سے فرنٹیئر کانسٹیبلری ایکٹ 1915 میں ترامیم کی منظوری دی گئی ہے، جس کے بعد پورے پاکستان میں ایف سی کے دائرہ اختیار کو بڑھانے کے لیے ایک آرڈیننس جاری کیا جائے گا۔
ذرائع کے مطابق اس فورس کا نام بدل کر فیڈرل کانسٹیبلری رکھا جائے گا، فیڈرل کانسٹیبلری کو چاروں صوبوں اور اسلام آباد میں کام کرنے کا اختیار دیا جائے گا جبکہ آزاد جموں و کشمیر اور گلگت بلتستان میں بھی کام کرنے کا اختیار دیا جائے گا۔
آرڈیننس کے نفاذ کے بعد، نئی فورس کے لیے ملک بھر میں بھرتی کی جائے گی، جس کے ملک بھر میں دفاتر قائم کیے جائیں گے، تنظیم نو فریم ورک کے تحت، فیڈرل کانسٹیبلری کی کمانڈ پولیس سروس آف پاکستان کے افسران کریں گے، فیڈرل کانسٹیبلری کے قیام سے ملکی داخلی سلامتی اور امن او عامہ کے قیام میں خاطر خواہ مدد ملے گی۔
ذرائع کے مطابق اس اقدام کو قومی سطح پر داخلی سلامتی کے طریقہ کار کو مضبوط اور مرکزی بنانے کی وسیع تر کوششوں کا حصہ قرار دیا جا رہا ہے۔