وزیراعلیٰ پنجاب مریم نواز نے اپنے بیٹے جنید صفدر کو چالان دینے والے اہلکار اور ڈیوٹی افسر کو سراہا اور آئی جی پنجاب کی کارگردگی کی تعریف کرتے ہوئے کہا کہ قانون سے کوئی بالاتر نہیں، وزیراعلیٰ کا بیٹا بھی قانون سے بالاتر نہیں، ماضی میں صرف کمزور کو ہی پکڑا جاتا تھا۔
لاہور میں پنجاب انفوسمینٹ اینڈ ریگولیٹری اتھارٹی کی تقریب سے خطاب کرتے ہوئے انہوں نے کہا کہ پچھلے دنوں میرا بیٹا جنید مجھے بتا رہا تھا کہ وہ اپنے گھر کی طرف آ رہا تھا اس کے ساتھ سیکیورٹی کی گاڑیاں تھیں اور اس کا ایک اپنا پروٹوکول ہوتا ہے۔
مریم نواز کا کہنا تھا کہ میں نے ڈالا کلچرل کے خلاف کریک ڈاؤن کیا ہے، مجھے شو آف پاور بالکل بھی پسند نہیں، میرے بیٹے کی سیکیورٹی کی گاڑی کو روکا گیا تو پیٹرولنگ کی گاڑی میں موجود اہلکاروں نے دیکھا کہ اگلی گاڑی میں جنید بیٹھا ہوا ہے تو انہیں پتہ چلا وہ جنید کے پاس آئے انہوں نے کہا کہ ہمیں پتہ نہیں تھا کہ اس گاڑی میں وزیر اعلیٰ کا بیٹا بیٹھا ہوا ہے تو انہوں نے اس پر معذرت کی۔
وزیراعلیٰ پنجاب کا مزید کہنا تھا کہ مجھے میرے بیٹے پر فخر ہوا کہ میرے بیٹے نے انہیں کہا، ’آپ نے اپنا کام کیا اور یہ آپ کی ڈیوٹی ہے، میں اس کے لیے آپ کو شاباش دیتا ہوں، آپ کریں میرا چالان۔
انہوں نے کہا کہ میرے بیٹے کا چالان کرنے والے اہلکار کا نام شاہ زیب تھا تو میں ڈی آئی جی آپریشن کو فون کیا اور کہا کہ میری شاہ زیب سے بات کروائیں، میں نے اس اہلکار کو کہا کہ مجھے آپ پر فخر ہے، چاہے وزیراعلیٰ اور یا اس کا بیٹا یا کوئی بھی ہو، قانون سے کوئی بالاتر نہیں ہو گا۔
ان کا کہنا تھا کہ ملک کا قانون ہر امیر اور غریب پر برابری کے ساتھ لاگو ہونا چاہیے، کمزور اور مظلوم کے ساتھ اب پوری ریاست کھڑی ہوگی۔
وزیراعلیٰ پنجاب مریم نواز نے یہ بھی کہا کہ صوبے میں امن و امان کی صورتِ حال دن بدن بہتر ہوتی جا رہی ہے۔