خیبرپختونخوا میں مخصوص نشستوں کے معاملے پر پاکستان تحریک انصاف کے رہنما بیرسٹر ڈاکٹر سیف نے شدید ردعمل دیا ہے۔ انہوں نے کہا ہے کہ مخصوص نشستوں پر اپوزیشن اراکین کا حلف لینا پارلیمانی سیاست کے سیاہ ترین باب کے طور پر یاد رکھا جائے گا۔
بیرسٹر سیف نے الزام عائد کیا کہ 26ویں آئینی ترمیم کا سہارا لے کر پارلیمانی اصولوں کو بری طرح پامال کیا گیا ہے۔ ان کا کہنا تھا کہ عوام کی طرف سے مسترد شدہ جماعتوں کو پی ٹی آئی کی مخصوص نشستیں دی گئیں، جو نہ صرف غیر جمہوری ہے بلکہ عوامی رائے کی توہین بھی ہے۔
خیبرپختونخوا: پی ٹی آئی کی حکمت عملی کامیاب، مخصوص نشستوں پر حلف برداری نہ ہوسکی، اجلاس ملتوی
انہوں نے کہا کہ مخصوص نشستوں پر زبردستی قابض ہوکر اپوزیشن نے پارلیمانی سیاست کی ساکھ کو شدید نقصان پہنچایا ہے، اور اس عمل کے ذمہ دار وہ سیاستدان ہیں جو اقتدار کے لیے ہر حد پار کرنے پر آمادہ ہیں۔
بیرسٹر سیف نے کہا کہ اگر اپوزیشن میں اخلاقی جرات ہوتی تو یہ مخصوص نشستیں قبول نہ کرتی، لیکن اقتدار کی ہوس نے ان سے سیاسی اصول چھین لیے ہیں۔ ان کا مزید کہنا تھا کہ اپوزیشن جماعتیں جیتنے کے باوجود غیر مطمئن نظر آتی ہیں، جب کہ پی ٹی آئی عوام کی بھرپور حمایت کے باعث ہار کر بھی مطمئن ہے۔
خیبرپختونخوا اسمبلی: مخصوص نشستوں پر حلف نہ ہونے سے سینیٹ الیکشن خطرے میں پڑ گیا
خیبرپختونخوا میں جاری سیاسی بحران اور سینیٹ انتخابات کی ممکنہ غیر یقینی صورتحال کے تناظر میں بیرسٹر سیف کا یہ بیان اپوزیشن اور حکومتی بیانیے کے درمیان جاری کشمکش کو مزید گہرا کرتا دکھائی دے رہا ہے۔