نوشکی میں پیٹرول سے بھرا ٹرک دھماکے سے پھٹ گیا، ڈرائیور جاں بحق

بلوچستان کے ضلع نوشکی میں ٹرک اڈے کے قریب پیٹرول سے بھرا ٹرک دھماکے سے پھٹ گیا، واقعے میں ایک ٹرک ڈرائیور جاں بحق جبکہ 50 سے زائد افراد جھلس کر زخمی ہوگئے۔

اطلاعات کے مطابق ٹرک میں آگ لگ گئی تھی، فائر بریگیڈ کا عملہ آگ بجھانے میں مصروف تھا، عوام کی بڑی تعداد بھی ٹرک کے قریب موجود تھی کہ اسی دوران ٹرک دھماکے سے پھٹ گیا جبکہ فائر بریگیڈ کی گاڑی سمیت کئی موٹرسائیکلیں بھی زد میں آگئیں۔

ریسکیو ذرائع نے کہا کہ واقے میں ایک ٹرک ڈرائیور جاں بحق جبکہ آگ لگنے سے 50 سے زائد افراد جھلس کر زخمی ہوئے ہیں، زخمیوں کو طبی امداد کی فراہمی کے لیے اسپتال منتقل کردیا گیا۔

ترجمان حکومت بلوچستان شاہد رند کے مطابق نوشکی میں افسوسناک حادثہ پیش آیا، جہاں ایک ٹرک میں اچانک آگ بھڑک اٹھی، آگ اتنی شدید تھی کہ موقع پر موجود فائر بریگیڈ کی گاڑی بھی متاثر ہوئی۔

شاہد رند نے بتایا کہ حادثے میں 30 سے زائد افراد کے جھلسنے کی اطلاعات ہیں، زخمیوں کو فوری طور پر ابتدائی طبی امداد فراہم کی گئی اور انہیں سول اسپتال نوشکی اور بی ایم سی کوئٹہ منتقل کیا جا رہا ہے، اسپتالوں میں ایمرجنسی نافذ کر دی گئی ہے اور متاثرہ افراد کو فوری طبی امداد فراہم کی جا رہی ہے۔

ترجمان بلوچستان حکومت نے واقعے کو انتہائی افسوسناک قرار دیتے ہوئے بتایا کہ حادثے کی تحقیقات جاری ہیں۔