ملک بھر میں مون سون بارشوں کا نیا سلسلہ شروع ہوگیا ہے، جس کے نتیجے میں نشیبی علاقوں میں سیلابی صورتحال پیدا ہونے کا خدشہ ہے جبکہ این ڈی ایم اے نے 25 جولائی تک ملک کے مختلف علاقوں میں ممکنہ سیلابی صورتحال کے حوالے سے الرٹ جاری کر دیا۔
تفصیلات کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے 25 جولائی تک ملک کے مختلف علاقوں میں مون سون بارشوں کے باعث ممکنہ سیلابی صورتحال کا الرٹ جاری کردیا۔
جڑواں شہروں اور خطہ پوٹھوہار میں آئندہ 12 گھنٹوں کے دوران موسلادھار بارش کا امکان ہے جبکہ بارش 50 ملی میٹر سے تجاوز کرنے کی توقع ہے۔
این ڈی ایم اے کے مطابق خیبر پختونخوا میں 25 جولائی تک وقفے وقفے سے بارشیں متوقع ہیں، دریائے کابل، سوات، پنجکوڑہ، کالپنی نالہ، اور بارہ نالہ میں طغیانی کا خطرہ ہے جبکہ نوشہرہ، مالاکنڈ، سوات، دیر، اور بالائی پہاڑی علاقوں میں سیلابی صورتحال اورلینڈ سلائیڈنگ کا امکان ہے۔
این ڈی ایم اے کے مطابق متعلقہ ادارے صورتحال پر مکمل نظر رکھے ہوئے ہیں، بروقت اقدامات کو یقینی بنایا جا رہا ہے۔شہریوں کو تیز بہاؤ کی صورت میں ندی نالوں، پلوں اور پانی میں ڈوبی سڑکوں سے دور رہنے کی ہدایت کی ہے جبکہ تمام متعلقہ اداروں کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنانے کا کہا گیا ہے۔