نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں مون سون بارشوں سے ہونے والے جانی و مالی نقصانات کی تفصیلات جاری کردیں، جس کے مطابق 26 جون سے اب تک مون سون بارشوں سے 221 افراد جاں بحق ہوئے۔
این ڈی ایم اے کی جانب سے جاری کردہ مون سون 2025 کی 26 ویں رپورٹ کے مطابق گزشتہ 24 گھنٹوں کے دوران مزید 5 افراد جاں بحق اور 10 زخمی ہوئے۔
رپورٹ میں بتایا گیا ہے کہ جاں بحق افراد میں 3 بچے شامل ہیں، خیبرپختونخوا کے اضلاع تورغر اور اپر دیر میں مکانات گرنے سے 4 جبکہ سندھ کے ضلع قمبر شہداد کوٹ میں ایک ہلاکت رپورٹ ہوئی جبکہ زخمی افراد کا تعلق خیبرپختونخوا کے اضلاع بونیر، تورغر، سوات اور اپر دیر سے ہے، جن میں مرد، خواتین اور بچے شامل ہیں۔
این ڈی ایم اے کے مطابق 26 جون سے اب تک جاری مون سون سلسلے کے دوران ملک بھر میں مجموعی طور پر 221 افراد جاں بحق اور 592 زخمی ہو چکے ہیں۔ پنجاب میں سب سے زیادہ 135 ہلاکتیں ہوئیں، خیبرپختونخوا میں 46، سندھ میں 22 افراد جاں بحق ہوئے جبکہ گلگت بلتستان، آزاد کشمیر اور اسلام آباد سے بھی جانی نقصان کی اطلاعات ہیں۔
رپورٹ کے مطابق اس دوران مجموعی طور پر 804 مکانات کو نقصان پہنچا، جن میں 203 مکانات مکمل طور پر تباہ ہو چکے ہیں، گلگت بلتستان میں 12، آزاد کشمیر میں 11، خیبرپختونخوا میں 220، سندھ میں 87 اور پنجاب میں 168 مکانات متاثر ہوئے۔
مختلف حادثات میں 200 مویشی بھی ہلاک ہوئے۔ سندھ میں سب سے زیادہ 85 مویشی ہلاک ہوئے جبکہ پنجاب اور خیبرپختونخوا سے بھی مویشیوں کی ہلاکت کی اطلاعات ملی ہیں۔
این ڈی ایم اے نے بتایا کہ گزشتہ روز سندھ میں 28 ڈی واٹرنگ پمپ اور 50 ترپالیں متاثرہ علاقوں میں بھجوائی گئیں جبکہ مجموعی طور پر 450 افراد کو ریسکیو کیا جا چکا ہے۔ پنجاب میں 24 ریلیف کیمپس قائم کیے گئے ہیں جبکہ سندھ میں 176 افراد ریلیف کیمپس میں مقیم ہیں۔
حکام کے مطابق متاثرہ علاقوں میں امدادی کارروائیاں جاری ہیں اور ممکنہ مزید بارشوں کے پیش نظر ادارے الرٹ پر ہیں۔ عوام سے اپیل کی گئی ہے کہ کسی بھی ایمرجنسی کی صورت میں فوری طور پر متعلقہ اداروں سے رابطہ کریں۔