کوئٹہ کی انسداد دہشت گردی عدالت نے ڈیگاری میں دہرے قتل کیس کے 2 ملزمان سردار شیرباز ساتکزئی اور محمد بشیر کا مزید 10 روزہ جسمانی ریمانڈ کرکرتے ہوئے پولیس کے حوالے کردیا گیا۔
تفصیلات کے مطابق کوئٹہ کی انسداد دہشت گردی عدالت کے جج محمد مبین نے ڈیگاری میں مرد اور خاتون کے قتل کے کیس کی سماعت کی۔
کوئٹہ کے علاقے ڈیگاری میں غیرت کے نام پر خاتون اور مرد کے دوہرے قتل میں نامزد 24 میں سے 2 گرفتار ملزمان سردار شیر باز ساتکزئی اور محمد بشیر کو اے ٹی سی کورٹ نمبر ایک کے جج محمد مبین کے روبرو پیش کیا گیا۔
سریس کرائمز انسوٹیگیشن ونگ نے دونوں ملزمان کے مزید 10 روز کے ریمانڈ کی استدعا کی، جسے منظور کرلیا گیا۔
عدالت نے گرفتار 2 ملزمان سردار شیر باز ساتکزئی اور محمد بشیر کے رییمانڈ میں 10 روز کی توسیع کردی۔
مقدمے میں نامزد مقتولہ کے بھائی جلال خان سیمت دیگر ملزمان کی گرفتاری کے لیے چھاپے مارے جارہے ہیں۔
واضح رہے کہ کوئٹہ کے نواحی علاقے ڈیگاری میں عیدالاضحیٰ سے 3 روز قبل بانو ستکزئی اور احسان اللہ سمالانی کو بے دردری سے سرعام قتل کیا گیا تھا، واقعے کی ویڈیو 2 روز قبل سوشل میڈیا پر وائرل ہوئی تھی جس کے بعد وزیراعلیٰ بلوچستان سردار سرفراز بگٹی کی جانب سے واقعے کا نوٹس لینے پرپولیس حرکت میں آئی تھی۔
واقعے کا مقدمہ ہنہ اوڑک تھانے میں ایچ ایچ او کی مدعیت میں درج کیا گیا تھا جبکہ پولیس نے مرکزی ملزم بشیر احمد اور ستکزئی قبیلے کے سربراہ سردار شیر باز ستکزئی، ان کے 4 بھائی اور 2 محافظوں سمیت دیگر ملزمان کو گرفتار کرلیا تھا۔
مدعی مقدمہ کے مطابق بانو ستکزئی اور احسان اللہ سمالانی کو کاروکاری کے الزام میں قتل کیا گیا، واقعے میں مبینہ طور پر شاہ وزیر، جلال، ٹکری منیر، بختیار، ملک امیر، عجب خان، جان محمد، بشیر احمد اور دیگر 15 نامعلوم افراد شامل تھے۔
مدعی نے الزام لگایا کہ ان افراد نے خاتون اور مرد کو سردار شیر باز خان کے سامنے پیش کیا جہاں سردار نے کاروکاری کا فیصلہ سنایا اور دونوں کو قتل کرنے کا حکم دیا، بعدازاں انہیں گاڑیوں میں لے جا کر کوئٹہ کے مضافاتی علاقے ڈیگاری میں فائرنگ کرکے قتل کیا گیا تھا۔
وزیراعلیٰ بلوچستان سردار سرفراز بگٹی نے پریس کانفرنس میں دعویٰ کیا تھا کہ ڈیگاری میں قتل کیے گئے خاتون اور مرد کا آپس میں کوئی رشتہ نہیں تھا، دونوں شادی شدہ تھے اور دونوں کو 5،5 بچے تھے۔