اسلام آباد میں تحریک تحفظ آئین پاکستان اور پاکستان تحریک انصاف کے قائدین نے مشترکہ پریس کانفرنس کرتے ہوئے ملک میں آئین و قانون کی بحالی، منصفانہ انتخابات اور عام آدمی کے حقوق کے تحفظ کے لیے نئی سیاسی تحریک کا اعلان کر دیا۔ پریس کانفرنس سے خطاب کرتے ہوئے محمود خان اچکزئی نے کہا کہ ملک کی تمام اپوزیشن جماعتیں ایک بڑے اتحاد کی طرف بڑھ رہی ہیں، اور یہ اتحاد کسی کھیل تماشے کے لیے نہیں بلکہ سنجیدہ قومی جدوجہد کے لیے بنایا جا رہا ہے۔
محمود اچکزئی کا کہنا تھا کہ یہ اتحاد کچھ لوگوں کو ہضم نہیں ہو رہا، لیکن ہم پیچھے ہٹنے والے نہیں۔ انہوں نے کہا کہ ہم ایک غیر جانبدار الیکشن کمیشن، آئین کی بالادستی، اور عام شہری کے بنیادی حقوق کی حفاظت کے لیے پرعزم ہیں۔ انہوں نے کہا کہ جس جماعت نے سب سے زیادہ ووٹ لیے، اسی کو انصاف سے محروم رکھا جا رہا ہے، اور بانی تحریک انصاف سے ملاقات کی اجازت بھی صرف مخصوص افراد کو دی جا رہی ہے، جب کہ ان کی بہنوں کو بھی ان سے ملنے نہیں دیا جا رہا۔
محمود اچکزئی نے کہا کہ ہم کسی فوجی افسر کے مخالف نہیں، لیکن ہر شخص کو آئینی دائرے میں رہ کر کام کرنا چاہیے۔ انہوں نے کہا کہ ”نہ ہم گالی دے رہے، نہ ڈنڈا مار رہے ہیں، ہم آئین کی بات کر رہے ہیں۔“ انہوں نے اعلان کیا کہ 31 جولائی اور 1 اگست کو ایک آل پارٹیز کانفرنس بلائی جا رہی ہے، جس میں ملک کی تمام جماعتوں کو دعوت دی جائے گی تاکہ ملکی حالات پر سنجیدہ غور کیا جا سکے۔ ان کا کہنا تھا کہ اگر ابھی مسائل کو حل نہ کیا گیا تو صورتحال مزید کشیدہ ہو جائے گی۔
پریس کانفرنس میں شریک وکیل اور سیاسی رہنما سلمان اکرم راجہ نے کہا کہ تحریک انصاف اس وقت ملک کی سب سے بڑی سیاسی جماعت ہے، لیکن صرف اس جماعت سے تعلق کی بنیاد پر اس کے رہنماؤں کو دس دس سال کی سزائیں دی جا رہی ہیں، جو انصاف کے تقاضوں کے سراسر خلاف ہے۔ انہوں نے کہا کہ ملک میں آزادیِ اظہار پر قدغن ہے، لوگ آزادی سے نہ بول سکتے ہیں نہ چل سکتے ہیں، اور بانی پی ٹی آئی گزشتہ دو سال سے قید میں ہیں۔
سلمان اکرم راجہ نے زور دیتے ہوئے کہا کہ فئیر ٹرائل ہر پاکستانی کا آئینی حق ہے، اور بانی پی ٹی آئی سمیت تمام قیدیوں کو یہ سہولت مہیا کی جائے۔ انہوں نے کہا کہ ملک ایک فرد سے بڑا ہے، اور یہ تحریک صرف تحریک انصاف کی نہیں بلکہ پورے پاکستان کی ہے۔ ان کا کہنا تھا کہ ہماری صفوں میں مختلف سیاسی جماعتوں کے نمائندے شامل ہیں، اور یہ تحریک عام آدمی کے حقوق کے تحفظ کے لیے ہے۔
انہوں نے اعلان کیا کہ 5 اگست کو ملک گیر احتجاج کیا جائے گا، تاکہ قوم کو یہ پیغام دیا جا سکے کہ آئین، انصاف اور جمہوریت کے لیے جدوجہد جاری رہے گی۔ سلمان اکرم راجہ نے کہا کہ ”یہ قوم کے ساتھ مذاق کیا جا رہا ہے، اور ہم یہ مذاق مزید برداشت نہیں کریں گے۔“