خیبرپختونخوا کے سیاحتی مقام وادی کاغان میں جھیل سیف الملوک جانے والی سڑک پر اچانک کلاؤڈ برسٹ کے باعث بڑا تودہ گر گیا، جس کے نتیجے میں 500 سے زائد سیاح پھنس گئے جبکہ 117 سے زائد جیپس بھی ملبے کے باعث بند راستے میں پھنس گئیں۔
واقعے کے بعد وزیراعلیٰ خیبرپختونخوا نے فوری طور پر ریسکیو آپریشن کی ہدایات جاری کیں، جس پر کاغان ڈویلپمنٹ اتھارٹی نے ہنگامی بنیادوں پر کارروائی کرتے ہوئے تمام سیاحوں کو بحفاظت نکال کر محفوظ مقامات پر منتقل کر دیا۔
سیکرٹری سیاحت عبدالصمد نے بتایا کہ حکومت خیبرپختونخوا سیاحوں کی حفاظت کو یقینی بنانے کے لیے ہر ممکن اقدامات کر رہی ہے۔ انہوں نے سیاحوں سے اپیل کی ہے کہ سفر کے دوران کسی بھی ایمرجنسی کی صورت میں ہیلپ لائن 1422 پر فوری رابطہ کریں۔
مون سون کے پانچویں اسپیل کا الرٹ جاری، شدید بارشوں کی پیشگوئی، طغیانی اور لینڈ سلائیڈنگ کا خطرہ
پشاور اور خیبرپختونخوا کے دیگر علاقوں میں موسم کی صورت حال
محکمہ موسمیات کے مطابق خیبرپختونخوا میں آئندہ 24 گھنٹوں کے دوران موسم عمومی طور پر گرم اور مرطوب رہے گا۔ تاہم، بالائی اضلاع میں چند مقامات پر گرج چمک کے ساتھ بارش کا امکان ظاہر کیا گیا ہے۔
دیر، سوات، مالاکنڈ، بونیر، شانگلہ، کوہستان، بٹگرام، تورغر، مانسہرہ، ایبٹ آباد اور جنوبی وزیرستان کے علاقوں میں بارش متوقع ہے۔ محکمہ موسمیات کے مطابق گذشتہ روز نوشہرہ، ایبٹ آباد اور سوات میں بارش ہوئی، جہاں چراٹ میں 9، کاکول میں 13 اور کالام میں 3 ملی میٹر بارش ریکارڈ کی گئی۔
چین میں بڑی تباہی: بادلوں نے ایک سال کی بارش ایک دن میں برسا دی، 19 ہزار افراد کا انخلا
پشاور میں کم سے کم درجہ حرارت 26 اور زیادہ سے زیادہ 36 ڈگری سینٹی گریڈ ریکارڈ کیا گیا، جبکہ صوبے کے ٹھنڈے علاقوں میں مالم جبہ میں کم ترین درجہ حرارت 14 اور کالام میں 15 ڈگری سینٹی گریڈ رہا۔
محکمہ موسمیات نے شہریوں اور سیاحوں کو موسمی تبدیلیوں سے باخبر رہنے اور احتیاطی تدابیر اختیار کرنے کی ہدایت کی ہے۔