ایشیا کپ 2025 کے حوالے سے اہم پیشرفت سامنے آئی ہے، بھارتی وزارت خارجہ نے بالآخر بھارتی کرکٹ بورڈ (بی سی سی آئی) کو گرین سگنل دے دیا ہے، جس کے بعد بھارتی کرکٹ ٹیم کے پاکستان میں میچ کھیلنے کی راہ ہموار ہو گئی ہے۔ بھارتی میڈیا کے مطابق اگلے 48 گھنٹوں کے دوران ایونٹ کا باقاعدہ شیڈول جاری کیے جانے کا قوی امکان ہے۔
ایشیا کپ رواں سال 8 سے 28 ستمبر تک منعقد ہوگا، جس میں پہلے گروپ اسٹیج اور پھر سپر فور مرحلہ کھیلا جائے گا۔ اس ایونٹ میں آٹھ ٹیمیں حصہ لیں گی جن میں پاکستان، بھارت، سری لنکا، بنگلہ دیش، افغانستان، متحدہ عرب امارات، عمان اور ہانگ کانگ شامل ہیں۔
بھارتی میڈیا کے مطابق بھارت، پاکستان اور بنگلہ دیش کے درمیان کچھ اختلافات موجود تھے جو اب خوش اسلوبی سے حل کر لیے گئے ہیں، جس کے بعد ٹورنامنٹ پلان کی راہ میں حائل بڑی رکاوٹیں دور ہو گئی ہیں۔
یو اے ای ممکنہ میزبان، سیاست سے دوری پر اتفاق
ذرائع کے مطابق متحدہ عرب امارات اور ابوظہبی ایشیا کپ کی میزبانی کے لیے مضبوط امیدوار کے طور پر سامنے آئے ہیں۔ جدید انفراسٹرکچر اور کرکٹ ایونٹس کی میزبانی کے وسیع تجربے کے باعث یو اے ای کو ایک سیاسی طور پر غیر جانبدار مقام تصور کیا جا رہا ہے۔
رپورٹ کے مطابق بی سی سی آئی اندرونِ خانہ شیڈول کی تیاری کے آخری مراحل میں ہے اور بھارتی ٹیم کو سفارتی منظوری ملنے کے بعد تیاریاں تیزی سے جاری ہیں۔
اے سی سی کا سالانہ اجلاس، اہم فیصلے
ایشین کرکٹ کونسل (اے سی سی) کا سالانہ اجلاس 24 جولائی کو ڈھاکہ میں ہوا جس میں باضابطہ طور پر ایشیا کپ کے حوالے سے کئی اہم فیصلے کیے گئے۔ اجلاس کی صدارت اے سی سی کے صدر اور چیئرمین پی سی بی محسن نقوی نے کی۔ اجلاس میں 25 رکن ممالک کے نمائندے شریک ہوئے، بعض نے آن لائن شرکت کی۔
محسن نقوی نے اجلاس کے بعد میڈیا سے گفتگو کرتے ہوئے کہا کہ بھارت کے ساتھ شیڈول سے متعلق بات چیت جاری ہے اور امید ہے کہ جلد حتمی تاریخوں کا اعلان کر دیا جائے گا۔ ان کا کہنا تھا کہ ٹورنامنٹ کو 6 کے بجائے 8 ٹیموں تک وسعت دینے پر بھی غور ہو رہا ہے۔
انہوں نے مزید کہا کہ اجلاس خوشگوار ماحول میں ہوا اور تمام رکن ممالک نے اس بات پر اتفاق کیا کہ کرکٹ کو سیاست سے دور رکھا جائے گا۔ محسن نقوی نے کہا کہ ’ہم سب نے ایشیا میں کرکٹ کے فروغ کے لیے یکجہتی سے کام کرنے پر اتفاق کیا ہے۔‘
پاک-بھارت میچ کا شدت سے انتظار
اگرچہ پاک-بھارت میچ کی تاریخ اور مقام کا اعلان تاحال نہیں ہوا، لیکن شائقین کرکٹ کو جلد خوشخبری سننے کی امید ہے۔ محسن نقوی نے شائقین سے اپیل کی کہ وہ باضابطہ اعلان کا انتظار کریں، جلد تفصیلات منظرِ عام پر آ جائیں گی۔