مشرقی کانگو کے قصبے کومانڈا میں علیحدگی پسند مسلح گروہ الائیڈ ڈیموکریٹک فورس (ADF) کے ارکان نے ایک کیتھولک چرچ پر حملہ کر دیا، جس کے نتیجے میں 21 سے زائد افراد ہلاک ہو گئے جبکہ متعدد مکانات اور دکانیں نذر آتش کر دی گئیں۔
امریکی خبر رساں ادارے کی رپورٹ کے مطابق الائیڈ ڈیموکریٹک فورس (اے ڈی ایف) نامی گروپ سے تعلق رکھنے والوں نے مقامی وقت کے مطابق دوپہر 1 بجے کیتھولک چرچ پر حملہ کیا۔
Komanda کے سول سوسائٹی کو آرڈینیٹر Dieudonne Duranthabo نے خبر رساں ادارے کو بتایا کہ چرچ کے اندر اور باہر 21 سے زائد افراد کو گولیوں سے نشانہ بنایا گیا۔
انہوں نے مزید بتایا کہ ہم نے چند جلی ہوئی لاشوں کو نکالا ہے جبکہ متعدد گھروں کو بھی جلا دیا گیا، مگر ابھی سرچ آپریشن جاری ہے۔
صوبے میں موجود کانگو فوج کی جانب سے اس حملے میں 10 افراد کی ہلاکت کی تصدیق کی گئی ہے۔
کئی شہری اس حملے کے بعد خوف کے باعث علاقے سے بھاگ کر بونیا کی طرف روانہ ہو گئے ہیں۔
فوجی ترجمان نے بتایا کہ ہم جانتے ہیں کہ آج مسلح افراد نے ایک چرچ پر حملہ کیا جس میں 10 افراد ہلاک ہوگئے جبکہ کچھ دکانوں کو بھی جلا دیا گیا۔
اس گروپ کی جانب سے جولائی سے شروع میں بھی اسی صوبے میں درجنوں افراد کو ہلاک کیا گیا تھا۔
یہ حملہ اے ڈی ایف کی جانب سے رواں ماہ کا دوسرا خونی واقعہ ہے۔ اس سے قبل اسی ماہ صوبہ ایتوری میں اسی گروہ نے درجنوں افراد کو قتل کیا تھا، جسے اقوام متحدہ کے ترجمان نے ”خونی قتل عام“ قرار دیا تھا۔
واضح رہے کہ یہ دہشت گرد گروپ داعش سے منسلک ہے۔