وفاقی وزیر برائے قومی غذائی تحفظ رانا تنویر حسین نے عمران خان کے بیٹوں کے آمد کے حوالے سے دلچسپ تبصرہ کرتے ہوئے کہا ہے کہ بانی پی ٹی آئی کے بیٹے آرہے ہیں یا جن بھوت آرہے ہیں؟ بانی کے بیٹوں کا انتظار کررہے ہیں کہ وہ آئیں۔
اسلام آباد میں میڈیا سے گفتگو کرتے ہوئے وفاقی وزیر غذائی تحفظ و تحقیق رانا تنویر حسین نے کہا کہ پیپلز پارٹی کو پہلے بھی حکومت میں آنے کی دعوت دی وہ نہیں آئے مگر اب مجھے علم نہیں وہ حکومت میں آرہے ہیں یا نہیں، پنجاب میں پیپلز پارٹی کو انتظامی امور میں مسئلہ ہے، وہ چاہتے ہیں انتظامی امور میں ان کا عمل دخل ہو، ہم نے پہلے ہی ان کو بہت زیادہ پذیرائی دی ہوئی ہے۔
عمران خان کے بیٹوں کی آمد کے حوالے سے رانا تنویر حسین نے کہا کہ بانی پی ٹی آئی کے بیٹے آرہے ہیں یا جن بھوت آرہے ہیں، ہم انتظار کررہے ہیں کہ وہ پاکستان آئیں، ہمیں معلوم ہے اور قوم کو بھی بتانا چاہتے ہیں عمران خان کو جن پاکستان مخالف قوتوں کی سپورٹ حاصل ہے انہی قوتوں کے ساتھ ان کے بیٹے رابطے کررہے ہیں جو عمران خان کی طرح ناکام ہوں گے۔
انہوں نے مزید کہا کہ عمران خان کے کیس عدالتوں میں ہیں، پاکستان کی عدالتیں آزاد ہیں،عمران خان کو اپنے کیسز کا سامنا کرنا ہوگا اور قانون انصاف کے تقاضے پورا کرنا ہوں گے۔
وفاقی وزیر کا کہنا تھا کہ بھارت سن لے اس نے ہمارا پانی روکا تو اسے جنگ تصویر کیا جائے گا، کشمیر ہماری شہ رگ ہے، بھارت کے ساتھ اس وقت تک تعلقات ٹھیک نہیں ہوسکتے جب تک کشمیر کا مسئلہ اقوام متحدہ کی قرادادوں کے مطابق حل نہیں ہوجاتا۔
رانا تنویر حسین نے مزید کہا کہ زرعی انقلاب کے لیے وزیر اعظم نے بہت سی ہدایات دی ہیں، ہم چاہتے ہیں کسان کو تمام سہولتیں ملیں، معیاری رجسٹرڈ بیج اورکھاد ملے، عوام دیکھیں گے اگلے چھ ماہ میں زرعی انقلاب کے اثرات نظر آنا شروع ہوجائیں گے۔