الیکشن کمیشن آف پاکستان (ای سی پی) نے 9 مئی کیسز میں سزا یافتہ پاکستان تحریک انصاف (پی ٹی آئی) کے سینیٹر اعجاز چوہدری، اپوزیشن لیڈر پنجاب اسمبلی ملک احمد خان بھچر اور احمد چٹھہ کو نااہل قرار دے دیا، جس کا نوٹیفکیشن جاری کردیا گی جبکہ ان کی اسمبلی کی نشستیں خالی ہوگئیں۔
تفصیلات کے مطابق الیکشن کمیشن نے رکن قومی اسمبلی سینیٹر اعجاز چوہدری کی نااہلی کا نوٹیفکیشن جاری کردیا۔ نوٹیفیکشن میں کہا گیا کہ انسداد دہشت گردی کی عدالت نے اعجاز چوہدری کو مجرم قرار دے کر 10 سال کی سزا سنائی ہے، اعجاز چوہدری آئین کے آرٹیکل 63 ون ایچ کے تحت رکن سینٹ رہنے سے نااہل ہوگئے ہیں۔
اسی طرح الیکشن کمیشن نے این اے 66 وزیر آباد سے پی ٹی آئی کے رکن قومی اسمبلی احمد چٹھہ اور پی پی 87 میانوالی سے پنجاب اسمبلی میں اپوزیشن لیڈر ملک احمد خان بھچر کو بھی نااہل قرار دے دیا گیا۔
الیکشن کمیشن کے مطابق انسداد دہشت گردی عدالت کے فیصلوں کے بعد دونوں ارکان کی نااہلی کا نوٹیفکیشن جاری کردیا گیا۔
9 مئی کیس: اپوزیشن لیڈر پنجاب اسمبلی سمیت 32 ملزمان کو 10، 10 سال قید کی سزا
نوٹیفکشن کے مطابق انسداد دہشت گردی کی عدالت نے احمد چٹھہ اور ملک احمد خان بھچڑ کو مجرم قرار دیتے ہوئے 10 سال کی سزا سنائی ہے۔
الیکشن کمیشن کے نوٹیفکیشن کے بعد یہ تینوں نشستیں اب خالی ہوچکی ہیں اور ان نشستوں پر ضمنی الیکشن ہوگا۔
یاد رہے یکہ احمد چٹھہ این اے 66 وزیر آباد اور احمد خان پی پی 87 میانوالی سے منتخب ہوئے تھے۔
واضح رہے کہ 22 جولائی کو انسداد دہشت گردی عدالت سرگودھا نے 9 مئی 2023 کو میانوالی میں احتجاج کے مقدمے میں اپوزیشن لیڈر پنجاب اسمبلی ملک احمد بچھر اور اور رکن قومی اسمبلی احمد چٹھہ سمیت پی ٹی آئی کے 32 رہنماؤں اور کارکنوں کو 10، 10 سال قید کی سزا سنادی تھی۔
ملزمان پر پُرتشدد احتجاج، جلاؤ گھیراؤ اور دیگر سنگین الزامات عائد کیے گئے تھے۔
22 جولائی کو ہی لاہور کی انسدادِ دہشت گردی عدالت نے شیرپاؤ پل جلاؤ گھیراؤ کیس میں پاکستان تحریک انصاف کے رہنماؤں ڈاکٹر یاسمین راشد، میاں محمود الرشید، اعجاز چوہدری اور سرفراز چیمہ کو 10 10 سال قید کی سزا سنادی تھی جبکہ شاہ محمود قریشی و دیگر ملزمان کو بری کر دیا۔
بیرسٹر گوہر کا پی ٹی آئی رہنماؤں کی نااہلی پر ردعمل
دوسری جانب پاکستان تحریک انصاف کے چیئرمین بیرسٹر گوہر نے سینیٹر اعجاز چوہدری، اپوزیشن لیڈر پنجاب اسمبلی ملک احمد خان بچھر اور رکن قومی اسمبلی احمد چھٹہ کی نااہلی پر ردعمل دیا ہے۔
اپنے ٹویٹ میں بیرسٹر گوہر نے کہا کہ بس اب یہ سب کچھ بند ہونا چاہیے، ایسے اقدامات سے جمہوریت داؤ پر لگ گئی، الیکشن کمیشن پاکستان تحریک انصاف کے ساتھ امتیازی سلوک کررہا ہے۔
انہوں نے مزید کہا کہ الیکشن کمیشن کی جانب سے ملک احمد خان بچھر، احمد چھٹہ اور سینیٹر اعجاز چوہدری کو آرٹیکل 63 ون ایچ کے تحت نااہل کرنے کا نوٹیفکیشن بھی امتیازی رویے کی عکاسی کرتا ہے۔