پاکستان تحریک انصاف (پی ٹی آئی) کے بانی چیئرمین عمران خان نے اپنے دونوں بیٹوں کو پاکستان آنے سے روک دیا، سلیمان اور قاسم پاکستان میں کسی سیاسی احتجاج کا حصہ نہیں بنیں گے۔
ذرائع کے مطابق عمران خان کے بیٹوں کی جانب سے والد کی رہائی کے لیے احتجاج کی غرض سے پاکستان آنے کی خبریں سامنے آرہی تھیں تاہم آج ذرائع نے عمران خان کے حوالے سے بتایا ہے کہ ان کے بیٹے پاکستان نہیں آئیں گے۔
ذرائع کے مطابق منگل کو اڈیالہ جیل میں توشہ خانہ ٹو کیس کی سماعت کے دوران عمران خان سے پوچھا گیا کہ آپ کے بیٹے امریکا سے واپس جاچکے ہیں اور کیا آپ کے بیٹے 5 اگست کو احتجاج میں شرکت کریں گے؟ جس پر عمران خان نے بتایا کہ ان کے بچے پاکستان نہیں آرہے۔
ذرائع کے مطابق عمران خان نے کہا کہ احتجاجی تحریک ان کی جماعت نے چلانی ہے، جس سے ان کے بیٹوں کا تعلق نہیں ہے۔
مجھے دو تین ماہ سے جیل کے اندر نہیں جانے نہیں دیا جارہا، علیمہ خان
دوسری جانب بانی چیئرمین پی ٹی آئی عمران خان کی ہمشیرہ علیمہ خان نے اڈیالہ جیل کے باہر میڈیا سے گفتگو کرتے ہوئے کہا کہ مجھے دو تین ماہ سے جیل کے اندر نہیں جانے نہیں دیا جارہا، اب تو میری بہنوں کو بھی اندر جانے نہیں دیا جا رہا، اس وقت بانی پی ٹی آئی کو مکمل طور پر قید تنہائی میں رکھا جا رہا ہے۔
ان کے بقول جج نے گزشتہ سماعت پر حکم دیا تھا کہ فیملی اور وکلاء کو جیل میں عدالتی کارروائی کے لیے بلایا جائے لیکن جیل انتظامیہ عدالتی حکم کی مسلسل خلاف ورزی کررہی ہے۔
علیمہ خان نے کہا کہ ایک وکیل کوثین فیصل مفتی کو جیل کے اندر جانے کی اجازت ہے اور جرح کے لیے وکلا کی قانونی ٹیم ہوتی ہے، صرف ایک وکیل اکیلا کیا کر سکتا ہے، اب یہ صرف جلدی جلدی ٹرائل مکمل کرنے کے لیے یہ سب کررہے ہیں۔
صحافی نے سوال کیا کہ حکومتی حلقے تو کہہ رہے ہیں علیمہ خان نے پارٹی کو ہائی جیک کرلیا، جس پر وہ ہنس پڑیں۔ اور کہا کہ انہیں کہیں آپ آجائیں پارٹی کو سنبھال لیں، تم لے لو یہ پارٹی، ان سے اپنی پارٹی تو سنبھالی نہیں جاتی پی ٹی آئی کی کیا فکر پڑی ہے، ان کی اصل میں پارٹی کون سی ہے، ان کے پاس 6 لوگ ہیں کمپنی کی طرح پارٹی چلاتے ہیں۔
انہوں نے کہا کہ ایک بندہ اسحاق ڈار وزیر خارجہ بھی ہے اور ڈپٹی وزیر اعظم بھی، اسحاق ڈار شوگر بورڈ کا ایڈوائزر اور چئیرمین بھی ہے، ایک بندے کے پاس 10،10 عہدے ہیں، اگر یہ پارٹی ہوتی تو ہر بندے کے پاس ایک ایک عہدہ ہوتا۔
عمران خان کی ہمشیرہ کا کہنا تھا کہ ملک میں کیا ہورہا ہے ان لوگوں کو کوئی فکر نہیں ہے، انہیں صرف یہ پڑی ہوئی ہے کہ پی ٹی آئی میں کیا ہورہا ہے، چینی کے بحران کے بعد گندم کا بحران سر پر کھڑا ہے انہیں کوئی فکر نہیں۔
پی ٹی آئی تو پارلیمنٹ میں بھی اپوزیشن کا کردار ادا نہیں کررہی۔
پی ٹی آئی اراکین کی نااہلی اور ملکی حالیہ سیاسی صورتحال سے متعلق سوال پر علیمہ خان نے کہا کہ اس وقت اسمبلی کس طرح چلائی جارہی ہے؟ آواز اٹھانے والوں کو نااہل کیا جا رہا ہے، پنجاب کے ایوزیشن لیڈر کو نااہل کردیا گیا، اب پارلیمنٹ میں اپوزیشن لیڈر عمر ایوب کو نااہل کرنے جارہے ہیں، ملک میں قانون اور آئین کی بالادستی نہیں جو جس کا دل چاہتا ہے کرتا ہے۔