آئی ایس پی آر کے مطابق جی ایچ کیو میں پیپلز لبریشن آرمی چین کی 98ویں سالگرہ کی تقریب منعقد کی گئی۔ چینی سفیر جیانگ زائیڈونگ مہمانِ خصوصی تھے، جب کہ میجر جنرل وانگ ژونگ اور چینی سفارتخانے کے حکام بھی موجود تھے۔ اس تقریب میں پاک فوج کے سینئر افسران نے بھی شرکت کی۔
پاک فوج کے شعبہ برائے تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے پیپلز لبریشن آرمی چین کی 98ویں یومِ تاسیس پر چینی سفیر اور دیگر مہمانوں کا پُرتپاک خیرمقدم کیا۔ انہوں نے پی ایل اے کے دفاع، سیکیورٹی اور قومی ترقی میں اہم کردار کو سراہا اور کہا کہ پاکستان اور چین کے تعلقات مضبوط، منفرد اور وقت کی آزمائشوں پر پورا اترنے والے ہیں۔
فیلڈ مارشل عاصم منیر نے کہا کہ پاکستان اور چین کا تزویراتی اشتراک عالمی و علاقائی حالات کے باوجود ثابت قدم رہا ہے، جو باہمی اعتماد، غیر متزلزل حمایت اور مشترکہ عزم کی علامت ہے۔ ”پاک چین دوستی نہ صرف مضبوط ہے، بلکہ یہ ہر امتحان میں کامیاب رہی ہے،“ انہوں نے مزید کہا۔
آئی ایس پی آر کے مطابق انھوں نے اس بات پر زور دیا کہ پاکستان آرمی اور پی ایل اے کے تعلقات حقیقی معنوں میں بھائیوں کی طرح ہیں، اور دونوں افواج کی مشترکہ عسکری شراکت داری علاقائی استحکام کو فروغ دینے میں کلیدی کردار ادا کرتی رہے گی۔
چینی سفیر جیانگ زائیڈونگ نے یومِ تاسیس کی تقریب کے انعقاد پر فیلڈ مارشل سید عاصم منیر کا شکریہ ادا کیا اور دہشت گردی کے خلاف جنگ میں پاک افواج کے کردار کو خراجِ تحسین پیش کیا۔ انہوں نے کہا کہ چین پاکستان کے ساتھ اپنی اسٹریٹجک شراکت داری کو مزید مضبوط بنانے کے لیے پرعزم ہے۔